Chapter 125

א׳ שִׁ֗יר הַֽמַּֽ֫עֲל֥וֹת הַבֹּֽטְחִ֥ים בַּֽיהֹוָ֑ה כְּהַר־צִיּ֥וֹן לֹֽא־יִ֜מּ֗וֹט לְעוֹלָ֥ם יֵשֵֽׁב:

ב׳ יְרֽוּשָׁלִַ֗ם הָרִים֘ סָבִ֪יב לָ֥הּ וַֽ֖יהֹוָה סָבִ֣יב לְעַמּ֑וֹ מֵֽ֜עַתָּ֗ה וְעַד־עוֹלָֽם:

ג׳ כִּ֚י לֹ֪א יָנ֡וּחַ שֵׁ֚בֶט הָרֶ֗שַׁע עַל֘ גּוֹרַ֪ל הַצַּדִּ֫יקִ֥ים לְמַ֡עַן לֹֽא־יִשְׁלְח֖וּ הַצַּדִּיקִ֨ים | בְּעַוְלָ֬תָה יְדֵיהֶֽם:

ד׳ הֵיטִ֣יבָה יְ֖הֹוָה לַטּוֹבִ֑ים וְלִֽישָׁרִ֥ים בְּלִבּוֹתָֽם:

ה׳ וְהַמַּטִּ֚ים | עֲקַלְקַלּוֹתָ֗ם יֽוֹלִיכֵ֣ם יְ֖הֹוָה אֶת־פֹּֽעֲלֵ֣י הָאָ֑וֶן שָׁ֜ל֗וֹם עַל־יִשְׂרָאֵֽל: