Chapter 124

א׳ שִׁ֥יר הַֽמַּֽעֲל֗וֹת לְדָ֫וִ֥ד לוּלֵ֣י יְ֖הֹוָה שֶׁהָ֣יָה לָ֑נוּ יֹֽאמַר־נָ֥א יִשְׂרָאֵֽל:

ב׳ לוּלֵ֣י יְ֖הֹוָה שֶׁהָ֣יָה לָ֑נוּ בְּק֖וּם עָלֵ֣ינוּ אָדָֽם:

ג׳ אֲזַי חַיִּ֣ים בְּלָע֑וּנוּ בַּֽחֲר֖וֹת אַפָּ֣ם בָּֽנוּ:

ד׳ אֲזַי הַמַּ֣יִם שְׁטָפ֑וּנוּ נַ֜֗חְלָה עָבַ֥ר עַל־נַפְשֵֽׁנוּ:

ה׳ אֲזַי עָבַ֣ר עַל־נַפְשֵׁ֑נוּ הַ֜מַּ֗יִם הַזֵּֽידוֹנִֽים:

ו׳ בָּר֥וּךְ יְהֹוָ֑ה שֶׁלֹּ֖א נְתָנָ֥נוּ טֶ֜֗רֶף לְשִׁנֵּיהֶֽם:

ז׳ נַפְשֵׁ֗נוּ כְּצִפּ֥וֹר נִמְלְטָה֘ מִפַּ֪ח יֽ֫וֹקְשִׁ֥ים הַפַּ֥ח נִ֜שְׁבָּ֗ר וַֽאֲנַ֥חְנוּ נִמְלָֽטְנוּ:

ח׳ עֶזְרֵנוּ בְּשֵׁ֣ם יְהֹוָ֑ה עֹ֜שֵׂ֗ה שָׁמַ֥יִם וָאָֽרֶץ: