Yirmiyahu — Perek 5

ירמיה פרק ה׳

א׳ שֽׁוֹטְט֞וּ בְּחוּצ֣וֹת יְרֽוּשָׁלִַ֗ם וּרְאוּ־נָ֚א וּדְעוּ֙ וּבַקְשׁ֣וּ בִרְחֽוֹבוֹתֶ֔יהָ אִם־תִּמְצְא֣וּ אִ֔ישׁ אִם־יֵ֛שׁ עֹשֶׂ֥ה מִשְׁפָּ֖ט מְבַקֵּ֣שׁ אֱמוּנָ֑ה וְאֶסְלַ֖ח לָֽהּ:

ב׳ וְאִ֥ם חַי־יְהֹוָ֖ה יֹאמֵ֑רוּ לָכֵ֥ן לַשֶּׁ֖קֶר יִשָּׁבֵֽעוּ:

ג׳ יְהֹוָ֗ה עֵינֶיךָ֘ הֲל֣וֹא לֶֽאֱמוּנָה֒ הִכִּ֚יתָה אֹתָם֙ וְלֹא־חָ֔לוּ כִּלִּיתָ֕ם מֵֽאֲנ֖וּ קַ֣חַת מוּסָ֑ר חִזְּק֚וּ פְנֵיהֶם֙ מִסֶּ֔לַע מֵֽאֲנ֖וּ לָשֽׁוּב:

ד׳ וַֽאֲנִ֣י אָמַ֔רְתִּי אַךְ־דַּלִּ֖ים הֵ֑ם נֽוֹאֲל֕וּ כִּ֣י לֹ֚א יָֽדְעוּ֙ דֶּ֣רֶךְ יְהֹוָ֔ה מִשְׁפַּ֖ט אֱלֹֽהֵיהֶֽם:

ה׳ אֵֽלְכָה־לִּ֚י אֶל־הַגְּדֹלִים֙ וַֽאֲדַבְּרָ֣ה אוֹתָ֔ם כִּ֣י הֵ֗מָּה יָֽדְעוּ֙ דֶּ֣רֶךְ יְהֹוָ֔ה מִשְׁפַּ֖ט אֱלֹֽהֵיהֶ֑ם אַ֣ךְ הֵ֚מָּה יַחְדָּו֙ שָׁ֣בְרוּ עֹ֔ל נִתְּק֖וּ מֽוֹסֵרֽוֹת:

ו׳ עַל־כֵּן֩ הִכָּ֨ם אַרְיֵ֜ה מִיַּ֗עַר זְאֵ֚ב עֲרָבוֹת֙ יְשָׁדְדֵ֔ם נָמֵ֚ר שֹׁקֵד֙ עַל־עָ֣רֵיהֶ֔ם כָּל־הַיּוֹצֵ֥א מֵהֵ֖נָּה יִטָּרֵ֑ף כִּ֚י רַבּוּ֙ פִּשְׁעֵיהֶ֔ם עָֽצְמ֖וּ מְשֻׁבֽוֹתֵיהֶֽם:

ז׳ אֵ֚י לָזֹאת֙ אֶסְלַח־ (כתיב אֶסְלַוח־) לָ֔ךְ בָּנַ֣יִךְ עֲזָב֔וּנִי וַיִּשָּֽׁבְע֖וּ בְּלֹ֣א אֱלֹהִ֑ים וָֽאַשְׂבִּ֚עַ אוֹתָם֙ וַיִּנְאָ֔פוּ וּבֵ֥ית זוֹנָ֖ה יִתְגּוֹדָֽדוּ:

ח׳ סוּסִ֥ים מְיֻזָּנִ֖ים (כתיב מְוֻזָּנִ֖ים) מַשְׁכִּ֣ים הָי֑וּ אִ֛ישׁ אֶל־אֵ֥שֶׁת רֵעֵ֖הוּ יִצְהָֽלוּ:

ט׳ הַֽעַל־אֵ֥לֶּה לֽוֹא־אֶפְקֹ֖ד נְאֻם־יְהֹוָ֑ה וְאִם֙ בְּג֣וֹי אֲשֶׁר־כָּזֶ֔ה לֹ֥א תִתְנַקֵּ֖ם נַפְשִֽׁי:

י׳ עֲל֚וּ בְשָֽׁרוֹתֶ֙יהָ֙ וְשַׁחֵ֔תוּ וְכָלָ֖ה אַֽל־תַּֽעֲשׂ֑וּ הָסִ֙ירוּ֙ נְטִ֣ישׁוֹתֶ֔יהָ כִּ֛י ל֥וֹא לַֽיהֹוָ֖ה הֵֽמָּה:

י״א כִּי֩ בָג֨וֹד בָּֽגְד֜וּ בִּ֗י בֵּ֧ית יִשְׂרָאֵ֛ל וּבֵ֥ית יְהוּדָ֖ה נְאֻם־יְהֹוָֽה:

י״ב כִּֽחֲשׁוּ֙ בַּֽיהֹוָ֔ה וַיֹּֽאמְר֖וּ לוֹא־ה֑וּא וְלֹֽא־תָב֚וֹא עָלֵ֙ינוּ֙ רָעָ֔ה וְחֶ֥רֶב וְרָעָ֖ב ל֥וֹא נִרְאֶֽה:

י״ג וְהַנְּבִיאִים֙ יִֽהְי֣וּ לְר֔וּחַ וְהַדִּבֵּ֖ר אֵ֣ין בָּהֶ֑ם כֹּ֥ה יֵֽעָשֶׂ֖ה לָהֶֽם:

י״ד לָכֵ֗ן כֹּֽה־אָמַ֚ר יְהֹוָה֙ אֱלֹהֵ֣י צְבָא֔וֹת יַעַן דַּבֶּרְכֶ֔ם אֶת־הַדָּבָ֖ר הַזֶּ֑ה הִנְנִ֣י נֹתֵן֩ דְּבָרַ֨י בְּפִ֜יךָ לְאֵ֗שׁ וְהָעָ֥ם הַזֶּ֛ה עֵצִ֖ים וַֽאֲכָלָֽתַם:

ט״ו הִנְנִ֣י מֵבִיא֩ עֲלֵיכֶ֨ם גּ֧וֹי מִמֶּרְחָ֛ק בֵּ֥ית יִשְׂרָאֵ֖ל נְאֻם־יְהֹוָ֑ה גּ֣וֹי | אֵיתָ֣ן ה֗וּא גּ֚וֹי מֵֽעוֹלָם֙ ה֔וּא גּוֹי לֹֽא־תֵדַ֣ע לְשֹׁנ֔וֹ וְלֹ֥א תִשְׁמַ֖ע מַה־יְדַבֵּֽר:

ט״ז אַשְׁפָּת֖וֹ כְּקֶ֣בֶר פָּת֑וּחַ כֻּלָּ֖ם גִּבּוֹרִֽים:

י״ז וְאָכַ֨ל קְצִֽירְךָ֜ וְלַחְמֶ֗ךָ יֹֽאכְלוּ֙ בָּנֶ֣יךָ וּבְנוֹתֶ֔יךָ יֹאכַ֚ל צֹֽאנְךָ֙ וּבְקָרֶ֔ךָ יֹאכַ֥ל גַּפְנְךָ֖ וּתְאֵֽנָתֶ֑ךָ יְרֹשֵׁ֞שׁ עָרֵ֣י מִבְצָרֶ֗יךָ אֲשֶׁ֥ר אַתָּ֛ה בֹּטֵ֥חַ בָּהֵ֖נָּה בֶּחָֽרֶב:

י״ח וְגַ֛ם בַּיָּמִ֥ים הָהֵ֖מָּה נְאֻם־יְהֹוָ֑ה לֹֽא־אֶעֱשֶׂ֥ה אִתְּכֶ֖ם כָּלָֽה:

י״ט וְהָיָה֙ כִּ֣י תֹאמְר֔וּ תַּ֣חַת מֶ֗ה עָשָׂ֨ה יְהֹוָ֧ה אֱלֹהֵ֛ינוּ לָ֖נוּ אֶת־כָּל־אֵ֑לֶּה וְאָמַרְתָּ֣ אֲלֵיהֶ֗ם כַּֽאֲשֶׁ֨ר עֲזַבְתֶּ֚ם אוֹתִי֙ וַתַּֽעַבְד֞וּ אֱלֹהֵ֚י נֵכָר֙ בְּאַרְצְכֶ֔ם כֵּן תַּעַבְד֣וּ זָרִ֔ים בְּאֶ֖רֶץ לֹ֥א לָכֶֽם:

כ׳ הַגִּ֥ידוּ זֹ֖את בְּבֵ֣ית יַֽעֲקֹ֑ב וְהַשְׁמִיע֥וּהָ בִֽיהוּדָ֖ה לֵאמֹֽר:

כ״א שִׁמְעוּ־נָ֣א זֹ֔את עַ֥ם סָכָ֖ל וְאֵ֣ין לֵ֑ב עֵינַ֚יִם לָהֶם֙ וְלֹ֣א יִרְא֔וּ אָזְנַ֥יִם לָהֶ֖ם וְלֹ֥א יִשְׁמָֽעוּ:

כ״ב הַֽאוֹתִ֨י לֹֽא־תִירָ֜אוּ נְאֻם־יְהֹוָ֗ה אִ֚ם מִפָּנַי֙ לֹ֣א תָחִ֔ילוּ אֲשֶׁר־שַׂ֚מְתִּי חוֹל֙ גְּב֣וּל לַיָּ֔ם חָק־עוֹלָ֖ם וְלֹ֣א יַֽעַבְרֶ֑נְהוּ וַיִּֽתְגָּֽעֲשׁוּ֙ וְלֹ֣א יוּכָ֔לוּ וְהָמ֥וּ גַלָּ֖יו וְלֹ֥א יַֽעַבְרֻֽנְהוּ:

כ״ג וְלָעָ֚ם הַזֶּה֙ הָיָ֔ה לֵ֖ב סוֹרֵ֣ר וּמוֹרֶ֑ה סָ֖רוּ וַיֵּלֵֽכוּ:

כ״ד וְלוֹא־אָֽמְר֣וּ בִלְבָבָ֗ם נִ֚ירָא נָא֙ אֶת־יְהֹוָ֣ה אֱלֹהֵ֔ינוּ הַנֹּתֵ֥ן גֶּ֛שֶׁם יוֹרֶ֥ה (כתיב ויֹרֶ֥ה) וּמַלְק֖וֹשׁ בְּעִתּ֑וֹ שְׁבֻעֹ֛ת חֻקּ֥וֹת קָצִ֖יר יִשְׁמָר־לָֽנוּ:

כ״ה עֲו‍ֹנֽוֹתֵיכֶ֖ם הִטּוּ־אֵ֑לֶּה וְחַטֹּ֣אותֵיכֶ֔ם מָֽנְע֥וּ הַטּ֖וֹב מִכֶּֽם:

כ״ו כִּֽי־נִמְצְא֥וּ בְעַמִּ֖י רְשָׁעִ֑ים יָשׁוּר֙ כְּשַׁ֣ךְ יְקוּשִׁ֔ים הִצִּ֥יבוּ מַשְׁחִ֖ית אֲנָשִׁ֥ים יִלְכֹּֽדוּ:

כ״ז כִּכְלוּב֙ מָ֣לֵא ע֔וֹף כֵּ֥ן בָּתֵּיהֶ֖ם מְלֵאִ֣ים מִרְמָ֑ה עַל־כֵּ֥ן גָּֽדְל֖וּ וַֽיַּֽעֲשִֽׁירוּ:

כ״ח שָֽׁמְנ֣וּ עָֽשְׁת֗וּ גַּם עָֽבְר֣וּ דִבְרֵי־רָ֔ע דִּ֣ין לֹֽא־דָ֔נוּ דִּ֥ין יָת֖וֹם וְיַצְלִ֑יחוּ וּמִשְׁפַּ֥ט אֶבְיוֹנִ֖ים לֹ֥א שָׁפָֽטוּ:

כ״ט הַֽעַל־אֵ֥לֶּה לֹֽא־אֶפְקֹ֖ד נְאֻם־יְהֹוָ֑ה אִם בְּג֣וֹי אֲשֶׁר־כָּזֶ֔ה לֹ֥א תִתְנַקֵּ֖ם נַפְשִֽׁי:

ל׳ שַׁמָּה֙ וְשַׁ֣עֲרוּרָ֔ה נִֽהְיְתָ֖ה בָּאָֽרֶץ:

ל״א הַנְּבִאִ֞ים נִבְּא֣וּ־בַשֶּׁ֗קֶר וְהַכֹּֽהֲנִים֙ יִרְדּ֣וּ עַל־יְדֵיהֶ֔ם וְעַמִּ֖י אָֽ֣הֲבוּ כֵ֑ן וּמַֽה־תַּֽעֲשׂ֖וּ לְאַֽחֲרִיתָֽהּ: