Yechezkel — Perek 40

יחזקאל פרק מ׳

א׳ בְּעֶשְׂרִ֣ים וְחָמֵ֣שׁ שָׁנָ֣ה לְ֠גָֽלוּתֵנוּ בְּרֹ֨אשׁ הַשָּׁנָ֜ה בֶּֽעָשׂ֣וֹר לַחֹ֗דֶשׁ בְּאַרְבַּ֚ע עֶשְׂרֵה֙ שָׁנָ֔ה אַחַ֕ר אֲשֶׁ֥ר הֻכְּתָ֖ה הָעִ֑יר בְּעֶ֣צֶם | הַיּ֣וֹם הַזֶּ֗ה הָיְתָ֚ה עָלַי֙ יַד־יְהֹוָ֔ה וַיָּבֵ֥א אֹתִ֖י שָֽׁמָּה:

ב׳ בְּמַרְא֣וֹת אֱלֹהִ֔ים הֱבִיאַ֖נִי אֶל־אֶ֣רֶץ יִשְׂרָאֵ֑ל וַיְנִיחֵ֗נִי אֶל־הַ֚ר גָּבֹ֙הַּ֙ מְאֹ֔ד וְעָלָ֥יו כְּמִבְנֵה־עִ֖יר מִנֶּֽגֶב:

ג׳ וַיָּבֵ֨יא אוֹתִ֜י שָׁ֗מָּה וְהִנֵּה־אִישׁ֙ מַרְאֵ֙הוּ֙ כְּמַרְאֵ֣ה נְחֹ֔שֶׁת וּפְתִיל־פִּשְׁתִּ֥ים בְּיָד֖וֹ וּקְנֵ֣ה הַמִּדָּ֑ה וְה֥וּא עֹמֵ֖ד בַּשָּֽׁעַר:

ד׳ וַיְדַבֵּ֨ר אֵלַ֜י הָאִ֗ישׁ בֶּן־אָדָ֡ם רְאֵ֣ה בְעֵינֶיךָ֩ וּבְאָזְנֶ֨יךָ שְּׁמָ֜ע וְשִׂ֣ים לִבְּךָ֗ לְכֹ֚ל אֲשֶׁר־אֲנִי֙ מַרְאֶ֣ה אוֹתָ֔ךְ כִּ֛י לְמַ֥עַן הַרְאֽוֹתְכָ֖ה הֻבָ֣אתָה הֵ֑נָּה הַגֵּ֛ד אֶת־כָּל־אֲשֶׁר־אַתָּ֥ה רֹאֶ֖ה לְבֵ֥ית יִשְׂרָאֵֽל:

ה׳ וְהִנֵּ֥ה חוֹמָ֛ה מִח֥וּץ לַבַּ֖יִת סָבִ֣יב | סָבִ֑יב וּבְיַ֨ד הָאִ֜ישׁ קְנֵ֣ה הַמִּדָּ֗ה שֵׁשׁ־אַמּ֚וֹת בָּֽאַמָּה֙ וָטֹ֔פַח וַיָּ֜מָד אֶת־רֹ֚חַב הַבִּנְיָן֙ קָנֶ֣ה אֶחָ֔ד וְקוֹמָ֖ה קָנֶ֥ה אֶחָֽד:

ו׳ וַיָּב֗וֹא אֶל־שַׁ֙עַר֙ אֲשֶׁ֚ר פָּנָיו֙ דֶּ֣רֶךְ הַקָּדִ֔ימָה וַיַּ֖עַל בְּמַֽעֲלֹתָ֑יו (כתיב בְּמַֽעֲלֹתָ֑ו) וַיָּ֣מָד | אֶת־סַ֣ף הַשַּׁ֗עַר קָנֶ֚ה אֶחָד֙ רֹ֔חַב וְאֵת֙ סַ֣ף אֶחָ֔ד קָנֶ֥ה אֶחָ֖ד רֹֽחַב:

ז׳ וְהַתָּ֗א קָנֶ֨ה אֶחָ֥ד אֹ֙רֶךְ֙ וְקָנֶ֚ה אֶחָד֙ רֹ֔חַב וּבֵ֥ין הַתָּאִ֖ים חָמֵ֣שׁ אַמּ֑וֹת וְסַ֣ף הַ֠שַּׁעַר מֵאֵ֨צֶל אוּלָ֥ם הַשַּׁ֛עַר מֵֽהַבַּ֖יִת קָנֶ֥ה אֶחָֽד:

ח׳ וַיָּ֜מָד אֶת־אֻלָ֥ם הַשַּׁ֛עַר מֵֽהַבַּ֖יִת קָנֶ֥ה אֶחָֽד:

ט׳ וַיָּ֜מָד אֶת־אֻלָ֚ם הַשַּׁ֙עַר֙ שְׁמֹנֶ֣ה אַמּ֔וֹת וְאֵילָ֖יו (כתיב וְאֵילָ֖ו) שְׁתַּ֣יִם אַמּ֑וֹת וְאֻלָ֥ם הַשַּׁ֖עַר מֵֽהַבָּֽיִת:

י׳ וְתָאֵ֨י הַשַּׁ֜עַר דֶּ֣רֶךְ הַקָּדִ֗ים שְׁלֹשָׁ֚ה מִפֹּה֙ וּשְׁלֹשָׁ֣ה מִפֹּ֔ה מִדָּ֥ה אַחַ֖ת לִשְׁלָשְׁתָּ֑ם וּמִדָּ֥ה אַחַ֛ת לָאֵילִ֖ם מִפֹּ֥ה וּמִפּֽוֹ:

י״א וַיָּ֛מָד אֶת־רֹ֥חַב פֶּֽתַח־הַשַּׁ֖עַר עֶ֣שֶׂר אַמּ֑וֹת אֹ֣רֶךְ הַשַּׁ֔עַר שְׁל֥וֹשׁ עֶשְׂרֵ֖ה אַמּֽוֹת:

י״ב וּגְב֞וּל לִפְנֵ֚י הַתָּאוֹת֙ אַמָּ֣ה אֶחָ֔ת וְאַמָּה־אַחַ֥ת גְּב֖וּל מִפֹּ֑ה וְהַתָּ֕א שֵׁשׁ־אַמּ֣וֹת מִפּ֔וֹ וְשֵׁ֥שׁ אַמּ֖וֹת מִפּֽוֹ:

י״ג וַיָּ֣מָד אֶת־הַשַּׁ֗עַר מִגַּ֚ג הַתָּא֙ לְגַגּ֔וֹ רֹ֕חַב עֶשְׂרִ֥ים וְחָמֵ֖שׁ אַמּ֑וֹת פֶּ֖תַח נֶ֥גֶד פָּֽתַח:

י״ד וַיַּ֥עַשׂ אֶת־אֵילִ֖ים שִׁשִּׁ֣ים אַמָּ֑ה וְאֶל־אֵיל֙ הֶ֣חָצֵ֔ר הַשַּׁ֖עַר סָבִ֥יב | סָבִֽיב:

ט״ו וְעַ֗ל פְּנֵי֙ הַשַּׁ֣עַר הָֽאִית֔וֹן (כתיב הָֽיאִת֔וֹן) עַל־לִפְנֵ֕י אֻלָ֥ם הַשַּׁ֖עַר הַפְּנִימִ֑י חֲמִשִּׁ֖ים אַמָּֽה:

ט״ז וְחַלּוֹנ֣וֹת אֲטֻמ֣וֹת אֶֽל־הַתָּאִ֡ים וְאֶל֩ אֵֽלֵיהֵ֨מָה לִפְנִ֚ימָה לַשַּׁ֙עַר֙ סָבִ֣יב | סָבִ֔יב וְכֵ֖ן לָאֵֽלַמּ֑וֹת וְחַלּוֹנ֞וֹת סָבִ֚יב | סָבִיב֙ לִפְנִ֔ימָה וְאֶל־אַ֖יִל תִּֽמֹרִֽים:

י״ז וַיְבִיאֵ֗נִי אֶל־הֶֽחָצֵר֙ הַחִ֣יצוֹנָ֔ה וְהִנֵּ֚ה לְשָׁכוֹת֙ וְרִֽצְפָ֔ה עָשׂ֥וּי לֶֹֽחָצֵ֖ר סָבִ֣יב | סָבִ֑יב שְׁלֹשִׁ֥ים לְשָׁכ֖וֹת אֶל־הָרִֽצְפָֽה:

י״ח וְהָרִֽצְפָה֙ אֶל־כֶּ֣תֶף הַשְּׁעָרִ֔ים לְעֻמַּ֖ת אֹ֣רֶךְ הַשְּׁעָרִ֑ים הָרִֽצְפָ֖ה הַתַּחְתּוֹנָֽה:

י״ט וַיָּ֣מָד רֹ֡חַב מִלִּפְנֵי֩ הַשַּׁ֨עַר הַתַּחְתּ֜וֹנָה לִפְנֵ֨י הֶֽחָצֵ֧ר הַפְּנִימִ֛י מִח֖וּץ מֵאָ֣ה אַמָּ֑ה הַקָּדִ֖ים וְהַצָּפֽוֹן:

כ׳ וְהַשַּׁ֗עַר אֲשֶׁ֚ר פָּנָיו֙ דֶּ֣רֶךְ הַצָּפ֔וֹן לֶֽחָצֵ֖ר הַחִֽיצוֹנָ֑ה מָדַ֥ד אָרְכּ֖וֹ וְרָחְבּֽוֹ:

כ״א וְתָאָ֗יו (כתיב וְתָאָ֗ו) שְׁלוֹשָׁ֚ה מִפּוֹ֙ וּשְׁלֹשָׁ֣ה מִפּ֔וֹ וְאֵילָ֚יו (כתיב וְאֵילָ֚ו) וְאֵֽלַמָּיו֙ (כתיב וְאֵֽלַמָּו֙) הָיָ֔ה כְּמִדַּ֖ת הַשַּׁ֣עַר הָֽרִאשׁ֑וֹן חֲמִשִּׁ֚ים אַמָּה֙ אָרְכּ֔וֹ וְרֹ֕חַב חָמֵ֥שׁ וְעֶשְׂרִ֖ים בָּאַמָּֽה:

כ״ב וְחַלּוֹנָ֚יו (כתיב וְחַלּוֹנָ֚ו) וְאֵֽילַמָּיו֙ (כתיב וְאֵֽילַמָּו֙) וְתִ֣מֹרָ֔יו (כתיב וְתִ֣מֹרָ֔ו) כְּמִדַּ֣ת הַשַּׁ֔עַר אֲשֶׁ֥ר פָּנָ֖יו דֶּ֣רֶךְ הַקָּדִ֑ים וּבְמַֽעֲל֥וֹת שֶׁ֙בַע֙ יַֽעֲלוּ־ב֔וֹ וְאֵֽילַמָּ֖יו (כתיב וְאֵֽילַמָּ֖ו) לִפְנֵיהֶֽם:

כ״ג וְשַׁ֙עַר֙ לֶֽחָצֵ֣ר הַפְּנִימִ֔י נֶ֣גֶד הַשַּׁ֔עַר לַצָּפ֖וֹן וְלַקָּדִ֑ים וַיָּ֧מָד מִשַּׁ֛עַר אֶל־שַׁ֖עַר מֵאָ֥ה אַמָּֽה:

כ״ד וַיּֽוֹלִכֵ֙נִי֙ דֶּ֣רֶךְ הַדָּר֔וֹם וְהִנֵּה־שַׁ֖עַר דֶּ֣רֶךְ הַדָּר֑וֹם וּמָדַ֚ד אֵילָיו֙ (כתיב אֵילָו֙) וְאֵ֣ילַמָּ֔יו (כתיב וְאֵ֣ילַמָּ֔ו) כַּמִּדּ֖וֹת הָאֵֽלֶּה:

כ״ה וְחַלּוֹנִ֨ים ל֚וֹ וּלְאֵֽילַמָּיו֙ (כתיב וּלְאֵֽילַמָּו֙) סָבִ֣יב | סָבִ֔יב כְּהַֽחַלֹּנ֖וֹת הָאֵ֑לֶּה חֲמִשִּׁ֚ים אַמָּה֙ אֹ֔רֶךְ וְרֹ֕חַב חָמֵ֥שׁ וְעֶשְׂרִ֖ים אַמָּֽה:

כ״ו וּמַֽעֲל֚וֹת שִׁבְעָה֙ עֹֽלוֹתָ֔יו (כתיב עֹֽלוֹתָ֔ו) וְאֵֽילַמָּ֖יו (כתיב וְאֵֽילַמָּ֖ו) לִפְנֵיהֶ֑ם וְתִֽמֹרִ֣ים ל֗וֹ אֶחָ֥ד מִפּ֛וֹ וְאֶחָ֥ד מִפּ֖וֹ אֶל־אֵילָֽיו (כתיב אֵילָֽו) :

כ״ז וְשַׁ֛עַר לֶֽחָצֵ֥ר הַפְּנִימִ֖י דֶּ֣רֶךְ הַדָּר֑וֹם וַיָּ֨מָד מִשַּׁ֧עַר אֶל־הַשַּׁ֛עַר דֶּ֥רֶךְ הַדָּר֖וֹם מֵאָ֥ה אַמּֽוֹת:

כ״ח וַיְבִיאֵ֛נִי אֶל־חָצֵ֥ר הַפְּנִימִ֖י בְּשַׁ֣עַר הַדָּר֑וֹם וַיָּ֙מָד֙ אֶת־הַשַּׁ֣עַר הַדָּר֔וֹם כַּמִּדּ֖וֹת הָאֵֽלֶּה:

כ״ט וְתָאָ֞יו (כתיב וְתָאָ֞ו) וְאֵילָ֚יו (כתיב וְאֵילָ֚ו) וְאֵֽלַמָּיו֙ (כתיב וְאֵֽלַמָּו֙) כַּמִּדּ֣וֹת הָאֵ֔לֶּה וְחַלּוֹנ֥וֹת ל֛וֹ וּלְאֵלַמָּ֖יו (כתיב וּלְאֵלַמָּ֖ו) סָבִ֣יב | סָבִ֑יב חֲמִשִּׁ֚ים אַמָּה֙ אֹ֔רֶךְ וְרֹ֕חַב עֶשְׂרִ֥ים וְחָמֵ֖שׁ אַמּֽוֹת:

ל׳ וְאֵֽלַמּ֖וֹת סָבִ֣יב | סָבִ֑יב אֹ֗רֶךְ חָמֵ֚שׁ וְעֶשְׂרִים֙ אַמָּ֔ה וְרֹ֖חַב חָמֵ֥שׁ אַמּֽוֹת:

ל״א וְאֵילַמָּ֗ו אֶל־חָצֵר֙ הַחִ֣יצוֹנָ֔ה וְתִֽמֹרִ֖ים אֶל־אֵילָ֑יו (כתיב אֵילָ֑ו) וּמַֽעֲל֥וֹת שְׁמוֹנֶ֖ה מַֽעֲלָֽיו (כתיב מַֽעֲלָֽו) :

ל״ב וַיְבִיאֵ֛נִי אֶל־הֶֽחָצֵ֥ר הַפְּנִימִ֖י דֶּ֣רֶךְ הַקָּדִ֑ים וַיָּ֣מָד אֶת־הַשַּׁ֔עַר כַּמִּדּ֖וֹת הָאֵֽלֶּה:

ל״ג וְתָאָ֞יו (כתיב וְתָאָ֞ו) וְאֵלָ֚יו (כתיב וְאֵלָ֚ו) וְאֵֽלַמָּיו֙ (כתיב וְאֵֽלַמָּו֙) כַּמִּדּ֣וֹת הָאֵ֔לֶּה וְחַלּוֹנ֥וֹת ל֛וֹ וּלְאֵֽלַמָּ֖יו (כתיב וּלְאֵֽלַמָּ֖ו) סָבִ֣יב | סָבִ֑יב אֹרֶךְ חֲמִשִּׁ֣ים אַמָּ֔ה וְרֹ֕חַב חָמֵ֥שׁ וְעֶשְׂרִ֖ים אַמָּֽה:

ל״ד וְאֵֽלַמָּ֗יו (כתיב וְאֵֽלַמָּ֗ו) לֶֽחָצֵר֙ הַחִ֣יצוֹנָ֔ה וְתִֽמֹרִ֥ים אֶל־אֵלָ֖יו (כתיב אֵילָ֖ו) מִפּ֣וֹ וּמִפּ֑וֹ וּשְׁמֹנֶ֥ה מַֽעֲל֖וֹת מַֽעֲלָֽיו (כתיב מַֽעֲלָֽו) :

ל״ה וַיְבִיאֵ֖נִי אֶל־שַׁ֣עַר הַצָּפ֑וֹן וּמָדַ֖ד כַּמִּדּ֥וֹת הָאֵֽלֶּה:

ל״ו תָּאָיו֙ (כתיב תָּאָו֙) אֵלָ֣יו (כתיב אֵלָ֣ו) וְאֵֽלַמָּ֔יו (כתיב וְאֵֽלַמָּ֔ו) וְחַלּוֹנ֥וֹת ל֖וֹ סָבִ֣יב | סָבִ֑יב אֹרֶךְ חֲמִשִּׁ֣ים אַמָּ֔ה וְרֹ֕חַב חָמֵ֥שׁ וְעֶשְׂרִ֖ים אַמָּֽה:

ל״ז וְאֵילָ֗יו (כתיב וְאֵילָ֗ו) לֶֽחָצֵר֙ הַחִ֣יצוֹנָ֔ה וְתִֽמֹרִ֥ים אֶל־אֵילָ֖יו (כתיב אֵילָ֖ו) מִפּ֣וֹ וּמִפּ֑וֹ וּשְׁמֹנֶ֥ה מַֽעֲל֖וֹת מַֽעֲלָֽיו (כתיב מַֽעֲלָֽו) :

ל״ח וְלִשְׁכָּ֣ה וּפִתְחָ֔הּ בְּאֵילִ֖ים הַשְּׁעָרִ֑ים שָׁ֖ם יָדִ֥יחוּ אֶת־הָֽעֹלָֽה:

ל״ט וּבְאֻלָּ֣ם הַשַּׁ֗עַר שְׁנַ֚יִם שֻׁלְחָנוֹת֙ מִפּ֔וֹ וּשְׁנַ֥יִם שֻׁלְחָנ֖וֹת מִפֹּ֑ה לִשְׁח֚וֹט אֲלֵיהֶם֙ הָֽעוֹלָ֔ה וְהַֽחַטָּ֖את וְהָֽאָשָֽׁם:

מ׳ וְאֶל־הַכָּתֵ֣ף מִח֗וּצָה לָֽעוֹלֶה֙ לְפֶ֙תַח֙ הַשַּׁ֣עַר הַצָּפ֔וֹנָה שְׁנַ֖יִם שֻׁלְחָנ֑וֹת וְאֶל־הַכָּתֵ֣ף הָֽאַחֶ֗רֶת אֲשֶׁר֙ לְאֻלָ֣ם הַשַּׁ֔עַר שְׁנַ֖יִם שֻׁלְחָנֽוֹת:

מ״א אַרְבָּעָ֨ה שֻׁלְחָנ֜וֹת מִפֹּ֗ה וְאַרְבָּעָ֧ה שֻׁלְחָנ֛וֹת מִפֹּ֖ה לְכֶ֣תֶף הַשָּׁ֑עַר שְׁמוֹנָ֥ה שֻׁלְחָנ֖וֹת אֲלֵיהֶ֥ם יִשְׁחָֽטוּ:

מ״ב וְאַרְבָּעָה֩ שֻׁלְחָנ֨וֹת לָֽעוֹלָ֜ה אַבְנֵ֣י גָזִ֗ית אֹרֶךְ֩ אַמָּ֨ה אַחַ֚ת וָחֵ֙צִי֙ וְרֹ֨חַב אַמָּ֚ה אַחַת֙ וָחֵ֔צִי וְגֹ֖בַהּ אַמָּ֣ה אֶחָ֑ת אֲלֵיהֶ֗ם וְיַנִּ֚יחוּ אֶת־הַכֵּלִים֙ אֲשֶׁ֨ר יִשְׁחֲט֧וּ אֶת־הָֽעוֹלָ֛ה בָּ֖ם וְהַזָּֽבַח:

מ״ג וְהַֽשְׁפַתַּ֗יִם טֹ֧פַח אֶחָ֛ד מוּכָנִ֥ים בַּבַּ֖יִת סָבִ֣יב | סָבִ֑יב וְאֶל־הַשֻּׁלְחָנ֖וֹת בְּשַׂ֥ר הַקָּֽרְבָֽן:

מ״ד וּמִחוּצָה֩ לַשַּׁ֨עַר הַפְּנִימִ֜י לִֽשְׁכ֣וֹת שָׁרִ֗ים בֶּֽחָצֵ֚ר הַפְּנִימִי֙ אֲשֶׁ֚ר אֶל־כֶּ֙תֶף֙ שַׁ֣עַר הַצָּפ֔וֹן וּפְנֵיהֶ֖ם דֶּ֣רֶךְ הַדָּר֑וֹם אֶחָ֗ד אֶל־כֶּ֙תֶף֙ שַׁ֣עַר הַקָּדִ֔ים פְּנֵ֖י דֶּ֥רֶךְ הַצָּפֹֽן:

מ״ה וַיְדַבֵּ֖ר אֵלָ֑י זֹ֣ה הַלִּשְׁכָּ֗ה אֲשֶׁ֚ר פָּנֶ֙יהָ֙ דֶּ֣רֶךְ הַדָּר֔וֹם לַכֹּ֣הֲנִ֔ים שֹֽׁמְרֵ֖י מִשְׁמֶ֥רֶת הַבָּֽיִת:

מ״ו וְהַלִּשְׁכָּ֗ה אֲשֶׁ֚ר פָּנֶ֙יהָ֙ דֶּ֣רֶךְ הַצָּפ֔וֹן לַכֹּֽ֣הֲנִ֔ים שֹֽׁמְרֵ֖י מִשְׁמֶ֣רֶת הַמִּזְבֵּ֑חַ הֵ֣מָּה בְנֵֽי־צָד֗וֹק הַקְּרֵבִ֧ים מִבְּנֵֽי־לֵוִ֛י אֶל־יְהֹוָ֖ה לְשָׁרְתֽוֹ:

מ״ז וַיָּ֨מָד אֶת־הֶֽחָצֵ֜ר אֹ֣רֶךְ | מֵאָ֣ה אַמָּ֗ה וְרֹ֛חַב מֵאָ֥ה אַמָּ֖ה מְרֻבָּ֑עַת וְהַמִּזְבֵּ֖חַ לִפְנֵ֥י הַבָּֽיִת:

מ״ח וַיְבִאֵנִי֘ אֶל־אֻלָ֣ם הַבַּיִת֒ וַיָּ֙מָד֙ אֵ֣ל אֻלָ֔ם חָמֵ֚שׁ אַמּוֹת֙ מִפֹּ֔ה וְחָמֵ֥שׁ אַמּ֖וֹת מִפֹּ֑ה וְרֹ֣חַב הַשַּׁ֔עַר שָׁלֹ֚שׁ אַמּוֹת֙ מִפּ֔וֹ וְשָׁלֹ֥שׁ אַמּ֖וֹת מִפּֽוֹ:

מ״ט אֹ֣רֶךְ הָֽאֻלָ֔ם עֶשְׂרִ֣ים אַמָּ֗ה וְרֹ֙חַב֙ עַשְׁתֵּ֣י עֶשְׂרֵ֣ה אַמָּ֔ה וּבַמַּֽעֲל֔וֹת אֲשֶׁ֥ר יַֽעֲל֖וּ אֵלָ֑יו וְעַמֻּדִים֙ אֶל־הָ֣אֵילִ֔ים אֶחָ֥ד מִפֹּ֖ה וְאֶחָ֥ד מִפֹּֽה: