Yechezkel — Perek 31

א׳ וַיְהִ֗י בְּאַחַ֚ת עֶשְׂרֵה֙ שָׁנָ֔ה בַּשְּׁלִישִׁ֖י בְּאֶחָ֣ד לַחֹ֑דֶשׁ הָיָ֥ה דְבַר־יְהֹוָ֖ה אֵלַ֥י לֵאמֹֽר:

ב׳ בֶּן־אָדָ֕ם אֱמֹ֛ר אֶל־פַּרְעֹ֥ה מֶֽלֶךְ־מִצְרַ֖יִם וְאֶל־הֲמוֹנ֑וֹ אֶל־מִ֖י דָּמִ֥יתָ בְגָדְלֶֽךָ:

ג׳ הִנֵּ֨ה אַשּׁ֜וּר אֶ֣רֶז בַּלְּבָנ֗וֹן יְפֵ֥ה עָנָ֛ף וְחֹ֥רֶשׁ מֵצַ֖ל וּגְבַ֣הּ קוֹמָ֑ה וּבֵ֣ין עֲבֹתִ֔ים הָֽיְתָ֖ה צַמַּרְתּֽוֹ:

ד׳ מַ֣יִם גִּדְּל֔וּהוּ תְּה֖וֹם רֹֽמְמָ֑תְהוּ אֶת־נַֽהֲרֹתֶ֗יהָ הֹלֵךְ֙ סְבִיב֣וֹת מַטָּעָ֔הּ וְאֶת־תְּעָֽלֹתֶ֣יהָ שִׁלְחָ֔ה אֶ֖ל כָּל־עֲצֵ֥י הַשָּׂדֶֽה:

ה׳ עַל־כֵּן֙ גָּֽבְהָ֣א קֹֽמָת֔וֹ מִכֹּ֖ל עֲצֵ֣י הַשָּׂדֶ֑ה וַתִּרְבֶּ֨ינָה סַרְעַפֹּתָ֜יו וַתֶּֽאֱרַ֧כְנָה פֹֽארֹתָ֛יו<span class="instructional ksiv"> (כתיב פֹֽארֹתָ֛ו) </span> מִמַּ֥יִם רַבִּ֖ים בְּשַׁלְּחֽוֹ:

ו׳ בִּסְעַפֹּתָ֚יו קִֽנְנוּ֙ כָּל־ע֣וֹף הַשָּׁמַ֔יִם וְתַ֚חַת פֹּֽארֹתָיו֙ יָֽלְד֔וּ כֹּ֖ל חַיַּ֣ת הַשָּׂדֶ֑ה וּבְצִלּוֹ֙ יֵֽשְׁב֔וּ כֹּ֖ל גּוֹיִ֥ם רַבִּֽים:

ז׳ וַיִּ֣יף בְּגָדְל֔וֹ בְּאֹ֖רֶךְ דָּֽלִיּוֹתָ֑יו כִּֽי־הָיָ֥ה שָׁרְשׁ֖וֹ אֶל־מַ֥יִם רַבִּֽים:

ח׳ אֲרָזִ֣ים לֹֽא־עֲמָמֻהוּ֘ בְּגַן־אֱלֹהִים֒ בְּרוֹשִׁ֗ים לֹ֚א דָמוּ֙ אֶל־סְעַפֹּתָ֔יו וְעַרְמֹנִ֥ים לֹֽא־הָי֖וּ כְּפֹֽרֹאתָ֑יו כָּל־עֵץ֙ בְּגַן־אֱלֹהִ֔ים לֹֽא־דָמָ֥ה אֵלָ֖יו בְּיָפְיֽוֹ:

ט׳ יָפֶ֣ה עֲשִׂיתִ֔יו בְּרֹ֖ב דָּֽלִיּוֹתָ֑יו וַיְקַנְאֻ֙הוּ֙ כָּל־עֲצֵי־עֵ֔דֶן אֲשֶׁ֖ר בְּגַ֥ן הָֽאֱלֹהִֽים:

י׳ לָכֵ֗ן כֹּ֚ה אָמַר֙ אֲדֹנָ֣י יֱהֹוִ֔ה יַ֕עַן אֲשֶׁ֥ר גָּבַ֖הְתָּ בְּקוֹמָ֑ה וַיִּתֵּ֚ן צַמַּרְתּוֹ֙ אֶל־בֵּ֣ין עֲבוֹתִ֔ים וְרָ֥ם לְבָב֖וֹ בְּגָבְהֽוֹ:

י״א וְאֶ֨תְּנֵ֔הוּ בְּיַ֖ד אֵ֣יל גּוֹיִ֑ם עָשׂ֚וֹ יַֽעֲשֶׂה֙ ל֔וֹ כְּרִשְׁע֖וֹ גֵּֽרַשְׁתִּֽיהוּ:

י״ב וַיִּכְרְתֻ֧הוּ זָרִ֛ים עָֽרִיצֵ֥י גוֹיִ֖ם וַיִּטְּשֻׁ֑הוּ אֶל־הֶֽ֠הָרִים וּבְכָל־גֵּ֨אָיוֹת֜ נָֽפְל֣וּ דָֽלִיּוֹתָ֗יו וַתִּשָּׁבַ֚רְנָה פֹֽרֹאתָיו֙ בְּכֹל֙ אֲפִיקֵ֣י הָאָ֔רֶץ וַיֵּֽרְד֧וּ מִצִּלּ֛וֹ כָּל־עַמֵּ֥י הָאָֽרֶץ וַיִּטְּשֻֽׁהוּ:

י״ג עַל־מַפַּלְתּ֥וֹ יִשְׁכְּנ֖וּ כָּל־ע֣וֹף הַשָּׁמָ֑יִם וְאֶל־פֹּֽרֹאתָ֣יו הָי֔וּ כֹּ֖ל חַיַּ֥ת הַשָּׂדֶֽה:

י״ד לְמַ֡עַן אֲשֶׁר֩ לֹֽא־יִגְבְּה֨וּ בְקֽוֹמָתָ֜ם כָּל־עֲצֵי־מַ֗יִם וְלֹֽא־יִתְּנ֚וּ אֶת־צַמַּרְתָּם֙ אֶל־בֵּ֣ין עֲבֹתִ֔ים וְלֹֽא־יַֽעַמְד֧וּ אֵֽלֵיהֶ֛ם בְּגָבְהָ֖ם כָּל־שֹׁ֣תֵי מָ֑יִם כִּ֣י כֻלָּם֩ נִתְּנ֨וּ לַמָּ֜וֶת אֶל־אֶ֣רֶץ תַּחְתִּ֗ית בְּת֛וֹךְ בְּנֵ֥י אָדָ֖ם אֶל־י֥וֹרְדֵי בֽוֹר:

ט״ו כֹּֽה־אָמַ֞ר אֲדֹנָ֣י יֱהֹוִ֗ה בְּי֨וֹם רִדְתּ֚וֹ שְׁאֹ֙לָה֙ הֶֽאֱבַ֔לְתִּי כִּסֵּ֚תִי עָלָיו֙ אֶת־תְּה֔וֹם וָֽאֶמְנַע֙ נַֽהֲרוֹתֶ֔יהָ וַיִּכָּֽלְא֖וּ מַ֣יִם רַבִּ֑ים וָֽאַקְדִּ֚ר עָלָיו֙ לְבָנ֔וֹן וְכָל־עֲצֵ֥י הַשָּׂדֶ֖ה עָלָ֥יו עֻלְפֶּֽה:

ט״ז מִקּ֚וֹל מַפַּלְתּוֹ֙ הִרְעַ֣שְׁתִּי גוֹיִ֔ם בְּהֽוֹרִדִ֥י אֹת֛וֹ שְׁאֹ֖לָה אֶת־י֣וֹרְדֵי ב֑וֹר וַיִּנָּ֨חֲמ֜וּ בְּאֶ֚רֶץ תַּחְתִּית֙ כָּל־עֲצֵי־עֵ֔דֶן מִבְחַ֥ר וְטֽוֹב־לְבָנ֖וֹן כָּל־שֹׁ֥תֵי מָֽיִם:

י״ז גַּם־הֵ֗ם אִתּ֛וֹ יָֽרְד֥וּ שְׁאֹ֖לָה אֶל־חַלְלֵי־חָ֑רֶב וּזְרֹע֛וֹ יָֽשְׁב֥וּ בְצִלּ֖וֹ בְּת֥וֹךְ גּוֹיִֽם:

י״ח אֶל־מִ֨י דָמִ֥יתָ כָּ֛כָה בְּכָב֥וֹד וּבְגֹ֖דֶל בַּֽעֲצֵי־עֵ֑דֶן וְהֽוּרַדְתָּ֙ אֶת־עֲצֵי־עֵ֜דֶן אֶל־אֶ֣רֶץ תַּחְתִּ֗ית בְּת֨וֹךְ עֲרֵלִ֚ים תִּשְׁכַּב֙ אֶת־חַלְלֵי־חֶ֔רֶב ה֚וּא פַרְעֹה֙ וְכָל־הֲמוֹנ֔וֹ<span class="instructional ksiv"> (כתיב הֲמוֹנֹה) </span> נְאֻ֖ם אֲדֹנָ֥י יֱהֹוִֽה: