Iyov — Perek 42

איוב פרק מ״ב

א׳ וַיַּ֖עַן אִיּ֥וֹב אֶת־יְהֹוָ֗ה וַיֹּאמַֽר:

ב׳ יָ֖דַעְתִּי (כתיב יָדַעְתִּ) כִּי־כֹ֣ל תּוּכָ֑ל וְלֹא־יִבָּצֵ֖ר מִמְּךָ֣ מְזִמָּֽה:

ג׳ מִ֚י זֶ֨ה | מַעְלִ֥ים עֵצָ֗ה בְּלִ֫י דָ֥עַת לָכֵ֣ן הִ֖גַּדְתִּי וְלֹ֣א אָבִ֑ין נִפְלָא֥וֹת מִ֜מֶּ֗נִּי וְלֹ֣א אֵדָֽע:

ד׳ שְֽׁמַע־נָ֖א וְאָֽנֹכִ֣י אֲדַבֵּ֑ר אֶ֜שְׁאָֽלְךָ֗ וְהֽוֹדִיעֵֽנִי:

ה׳ לְשֵֽׁמַע־אֹ֥זֶן שְׁמַעְתִּ֑יךָ וְ֜עַתָּ֗ה עֵינִ֥י רָאָֽתְךָ:

ו׳ עַל־כֵּ֖ן אֶמְאַ֣ס וְנִחַ֑מְתִּי עַל־עָפָ֥ר וָאֵֽפֶר:

ז׳ וַיְהִ֗י אַחַ֨ר דִּבֶּ֧ר יְהֹוָ֛ה אֶת־הַדְּבָרִ֥ים הָאֵ֖לֶּה אֶל־אִיּ֑וֹב וַיֹּ֨אמֶר יְהֹוָה֜ אֶל־אֱלִיפַ֣ז הַתֵּֽימָנִ֗י חָרָ֨ה אַפִּ֚י בְךָ֙ וּבִשְׁנֵ֣י רֵעֶ֗יךָ כִּ֠י לֹ֣א דִּבַּרְתֶּ֥ם אֵלַ֛י נְכוֹנָ֖ה כְּעַבְדִּ֥י אִיּֽוֹב:

ח׳ וְעַתָּ֡ה קְחֽוּ־לָכֶ֣ם שִׁבְעָֽה־פָרִים֩ וְשִׁבְעָ֨ה אֵילִי֜ם וּלְכ֣וּ | אֶל־עַבְדִּ֣י אִיּ֗וֹב וְהַֽעֲלִיתֶ֚ם עוֹלָה֙ בַּֽעַדְכֶ֔ם וְאִיּ֣וֹב עַבְדִּ֔י יִתְפַּלֵּ֖ל עֲלֵיכֶ֑ם כִּ֧י אִם־פָּנָ֣יו אֶשָּׂ֗א לְבִלְתִּ֞י עֲשׂ֚וֹת עִמָּכֶם֙ נְבָלָ֔ה כִּ֠י לֹ֣א דִבַּרְתֶּ֥ם אֵלַ֛י נְכוֹנָ֖ה כְּעַבְדִּ֥י אִיּֽוֹב:

ט׳ וַיֵּֽלְכוּ֩ אֱלִיפַ֨ז הַתֵּֽימָנִי֜ וּבִלְדַּ֣ד הַשּׁוּחִ֗י צֹפַר֙ הַנַּ֣עֲמָתִ֔י וַיַּ֣עֲשׂ֔וּ כַּֽאֲשֶׁ֛ר דִּבֶּ֥ר אֲלֵיהֶ֖ם יְהֹוָ֑ה וַיִּשָּׂ֥א יְהֹוָ֖ה אֶת־פְּנֵ֥י אִיּֽוֹב:

י׳ וַֽיהֹוָ֗ה שָׁ֤ב אֶת־שְׁב֣וּת (כתיב שְׁב֣יּת) אִיּ֔וֹב בְּהִֽתְפַּלְל֖וֹ בְּעַ֣ד רֵעֵ֑הוּ וַיֹּ֧סֶף יְהֹוָ֛ה אֶת־כָּל־אֲשֶׁ֥ר לְאִיּ֖וֹב לְמִשְׁנֶֽה:

י״א וַיָּבֹ֣אוּ אֵ֠לָיו כָּל־אֶחָ֨יו וְכָל־אַחְיוֹתָיו֜ (כתיב אַחְיֹתָיו֜) וְכָל־יֹֽדְעָ֣יו לְפָנִ֗ים וַיֹּאכְל֨וּ עִמּ֣וֹ לֶחֶם֘ בְּבֵיתוֹ֒ וַיָּנֻ֚דוּ לוֹ֙ וַיְנַֽחֲמ֣וּ אֹת֔וֹ עַ֤ל כָּל־הָ֣רָעָ֔ה אֲשֶׁר־הֵבִ֥יא יְהֹוָ֖ה עָלָ֑יו וַיִּתְּנוּ־ל֗וֹ אִ֤ישׁ קְשִׂיטָ֣ה אֶחָ֔ת וְאִ֕ישׁ נֶ֥זֶם זָהָ֖ב אֶחָֽד:

י״ב וַֽיהֹוָ֗ה בֵּרַ֛ךְ אֶת־אַֽחֲרִ֥ית אִיּ֖וֹב מֵרֵֽאשִׁת֑וֹ וַֽיְהִי־ל֡וֹ אַרְבָּעָה֩ עָשָׂ֨ר אֶלֶ֜ף צֹ֗אן וְשֵׁ֚שֶׁת אֲלָפִים֙ גְּמַלִּ֔ים וְאֶ֛לֶף־צֶ֥מֶד בָּקָ֖ר וְאֶ֥לֶף אֲתוֹנֽוֹת:

י״ג וַֽיְהִי־ל֛וֹ שִׁבְעָ֥נָה בָנִ֖ים וְשָׁל֥וֹשׁ בָּנֽוֹת:

י״ד וַיִּקְרָ֚א שֵֽׁם־הָֽאַחַת֙ יְמִימָ֔ה וְשֵׁ֥ם הַשֵּׁנִ֖ית קְצִיעָ֑ה וְשֵׁ֥ם הַשְּׁלִישִׁ֖ית קֶ֥רֶן הַפּֽוּךְ:

ט״ו וְלֹ֨א נִמְצָא֜ נָשִׁ֥ים יָפ֛וֹת כִּבְנ֥וֹת אִיּ֖וֹב בְּכָל־הָאָ֑רֶץ וַיִּתֵּ֨ן לָהֶ֧ם אֲבִיהֶ֛ם נַֽחֲלָ֖ה בְּת֥וֹךְ אֲחֵיהֶֽם:

ט״ז וַיְחִ֚י אִיּוֹב֙ אַֽחֲרֵי־זֹ֔את מֵאָ֥ה וְאַרְבָּעִ֖ים שָׁנָ֑ה וַיִּרְאֶ֤ה (כתיב וַיִּרְאֶ֤) אֶת־בָּנָיו֙ וְאֶת־בְּנֵ֣י בָנָ֔יו אַרְבָּעָ֖ה דֹּרֽוֹת:

י״ז וַיָּ֣מָת אִיּ֔וֹב זָקֵ֖ן וּשְׂבַ֥ע יָמִֽים: