Iyov — Perek 41

א׳ הֵן־תּֽוֹחַלְתּ֥וֹ נִכְזָ֑בָה הֲגַ֖ם אֶל־מַרְאָ֣יו יֻטָֽל:

ב׳ לֹֽא־אַ֖כְזָר כִּ֣י יְעוּרֶ֑נּוּ וּמִ֥י ה֜֗וּא לְפָנַ֥י יִתְיַצָּֽב:

ג׳ מִ֣י הִ֖קְדִּימַנִי וַֽאֲשַׁלֵּ֑ם תַּ֖חַת כָּל־הַשָּׁמַ֣יִם לִי־הֽוּא:

ד׳ לוֹ־<span class="instructional ksiv"> (כתיב לֹא) </span> אַֽחֲרִ֥ישׁ בַּדָּ֑יו וּדְבַר־גְּ֜בוּר֗וֹת וְחִ֣ין עֶרְכּֽוֹ:

ה׳ מִֽי־גִ֖לָּה פְּנֵ֣י לְבוּשׁ֑וֹ בְּכֶ֥פֶל רִ֜סְנ֗וֹ מִ֣י יָבֽוֹא:

ו׳ דַּלְתֵ֣י פָ֖נָיו מִ֣י פִתֵּ֑חַ סְבִיב֖וֹת שִׁנָּ֣יו אֵימָֽה:

ז׳ גַּֽאֲוָה אֲפִיקֵ֣י מָֽגִנִּ֑ים סָ֜ג֗וּר חוֹתָ֥ם צָֽר:

ח׳ אֶחָ֣ד בְּאֶחָ֣ד יִגַּ֑שׁוּ וְ֜ר֗וּחַ לֹֽא־יָב֥וֹא בֵֽינֵיהֶֽם:

ט׳ אִֽישׁ־בְּאָחִ֥יהוּ יְדֻבָּ֑קוּ יִ֜תְלַכְּד֗וּ וְלֹ֣א יִתְפָּרָֽדוּ:

י׳ עֲטִישֹׁתָיו תָּ֣הֶל א֑וֹר וְ֜עֵינָ֗יו כְּעַפְעַפֵּי־שָֽׁחַר:

י״א מִפִּיו לַפִּידִ֣ים יַֽהֲלֹ֑כוּ כִּיד֥וֹדֵי אֵ֜֗שׁ יִתְמַלָּֽטוּ:

י״ב מִנְּחִירָיו יֵצֵ֣א עָשָׁ֑ן כְּד֖וּד נָפ֣וּחַ וְאַגְמֹֽן:

י״ג נַפְשׁוֹ גֶּחָלִ֣ים תְּלַהֵ֑ט וְ֜לַ֗הַב מִפִּ֥יו יֵצֵֽא:

י״ד בְּֽצַוָּארוֹ יָלִ֣ין עֹ֑ז וּ֜לְפָנָ֗יו תָּד֥וּץ דְּאָבָֽה:

ט״ו מַפְּלֵ֣י בְשָׂר֣וֹ דָבֵ֑קוּ יָצ֥וּק עָ֜לָ֗יו בַּל־יִמּֽוֹט:

ט״ז לִבּוֹ יָצ֣וּק כְּמוֹ־אָ֑בֶן וְ֜יָצ֗וּק כְּפֶ֣לַח תַּחְתִּֽית:

י״ז מִשֵּׂתוֹ יָג֣וּרוּ אֵלִ֑ים מִ֜שְּׁבָרִ֗ים יִתְחַטָּֽאוּ:

י״ח מַשִּׂיגֵ֣הוּ חֶ֖רֶב בְּלִ֣י תָק֑וּם חֲנִ֖ית מַסָּ֣ע וְשִׁרְיָֽה:

י״ט יַחְשֹׁ֣ב לְתֶ֣בֶן בַּרְזֶ֑ל לְעֵ֖ץ רִקָּב֣וֹן נְחוּשָֽׁה:

כ׳ לֹֽא־יַבְרִיחֶ֥נּוּ בֶן־קָ֑שֶׁת לְ֜קַ֗שׁ נֶהְפְּכוּ־ל֥וֹ אַבְנֵי־קָֽלַע:

כ״א כְּקַשׁ נֶחְשְׁב֣וּ תוֹתָ֑ח וְ֜יִשְׂחַ֗ק לְרַ֣עַשׁ כִּידֽוֹן:

כ״ב תַּחְתָּיו חַדּ֣וּדֵי חָ֑רֶשׂ יִרְפַּ֖ד חָר֣וּץ עֲלֵי־טִֽיט:

כ״ג יַרְתִּ֣יחַ כַּסִּ֣יר מְצוּלָ֑ה יָ֜֗ם יָשִׂ֥ים כַּמֶּרְקָחָֽה:

כ״ד אַֽחֲרָיו יָאִ֣יר נָתִ֑יב יַחְשֹׁ֖ב תְּה֣וֹם לְשֵׂיבָֽה:

כ״ה אֵֽין־עַל־עָפָ֥ר מָשְׁל֑וֹ הֶֽ֜עָשׂ֗וּ לִבְלִי־חָֽת:

כ״ו אֵֽת־כָּל־גָּבֹ֥הַּ יִרְאֶ֑ה ה֜֗וּא מֶ֣לֶךְ עַל־כָּל־בְּנֵי־שָֽׁחַץ: