Divrei Hayamim I — Perek 28

א׳ וַיַּקְהֵ֣ל דָּוִ֣יד אֶת־כָּל־שָׂרֵ֣י יִשְׂרָאֵ֡ל שָׂרֵ֣י הַשְּׁבָטִ֣ים וְשָׂרֵ֣י הַמַּחְלְק֣וֹת הַֽמְשָֽׁרְתִ֪ים אֶת־הַמֶּ֠֩לֶךְ וְשָׂרֵ֣י הָֽאֲלָפִ֣ים וְשָׂרֵ֣י הַמֵּא֡וֹת וְשָׂרֵ֣י כָל־רְכֽוּשׁ־וּמִקְנֶה֩ לַמֶּ֨לֶךְ וּלְבָנָ֜יו עִם־הַסָּֽרִיסִ֧ים וְהַגִּבּוֹרִ֛ים וּלְכָל־גִּבּ֥וֹר חָ֖יִל אֶל־יְרֽוּשָׁלִָֽם:

ב׳ וַיָּ֨קָם דָּוִ֚יד הַמֶּ֙לֶךְ֙ עַל־רַגְלָ֔יו וַיֹּ֕אמֶר שְׁמָע֖וּנִי אַחַ֣י וְעַמִּ֑י אֲנִ֣י עִם־לְבָבִ֡י לִבְנוֹת֩ בֵּ֨ית מְנוּחָ֜ה לַֽאֲר֣וֹן בְּרִֽית־יְהֹוָ֗ה וְלַֽהֲדֹם֙ רַגְלֵ֣י אֱלֹהֵ֔ינוּ וַֽהֲכִינ֖וֹתִי לִבְנֽוֹת:

ג׳ וְהָֽאֱלֹהִים֙ אָ֣מַר לִ֔י לֹֽא־תִבְנֶ֥ה בַ֖יִת לִשְׁמִ֑י כִּ֣י אִ֧ישׁ מִלְחָמ֛וֹת אַ֖תָּה וְדָמִ֥ים שָׁפָֽכְתָּ:

ד׳ וַיִּבְחַ֡ר יְהֹוָ֣ה אֱלֹהֵי֩ יִשְׂרָאֵ֨ל בִּ֜י מִכֹּ֣ל בֵּֽית־אָבִ֗י לִהְי֨וֹת לְמֶ֚לֶךְ עַל־יִשְׂרָאֵל֙ לְעוֹלָ֔ם כִּ֚י בִֽיהוּדָה֙ בָּחַ֣ר לְנָגִ֔יד וּבְבֵ֥ית יְהוּדָ֖ה בֵּ֣ית אָבִ֑י וּבִבְנֵ֣י אָבִ֔י בִּ֣י רָצָ֔ה לְהַמְלִ֖יךְ עַל־כָּל־יִשְׂרָאֵֽל:

ה׳ וּמִכָּ֨ל־בָּנַ֔י כִּי רַבִּ֣ים בָּנִ֔ים נָ֥תַן לִ֖י יְהֹוָ֑ה וַיִּבְחַר֙ בִּשְׁלֹמֹ֣ה בְנִ֔י לָשֶׁ֗בֶת עַל־כִּסֵּ֛א מַלְכ֥וּת יְהֹוָ֖ה עַל־יִשְׂרָאֵֽל:

ו׳ וַיֹּ֣אמֶר לִ֔י שְׁלֹמֹ֣ה בִנְךָ֔ הֽוּא־יִבְנֶ֥ה בֵיתִ֖י וַֽחֲצֵֽרוֹתָ֑י כִּֽי־בָחַ֨רְתִּי ב֥וֹ לִי֙ לְבֵ֔ן וַֽאֲנִ֖י אֶֽהְיֶה־לּ֥וֹ לְאָֽב:

ז׳ וַֽהֲכִינוֹתִ֥י אֶת־מַלְכוּת֖וֹ עַד־לְעוֹלָ֑ם אִם־יֶֽחֱזַ֗ק לַֽעֲשׂ֛וֹת מִצְו‍ֹתַ֥י וּמִשְׁפָּטַ֖י כַּיּ֥וֹם הַזֶּֽה:

ח׳ וְ֠עַתָּה לְעֵינֵ֨י כָל־יִשְׂרָאֵ֚ל קְהַל־יְהֹוָה֙ וּבְאָזְנֵ֣י אֱלֹהֵ֔ינוּ שִׁמְר֣וּ וְדִרְשׁ֔וּ כָּל־מִצְו‍ֹ֖ת יְהֹוָ֣ה אֱלֹהֵיכֶ֑ם לְמַ֚עַן תִּֽירְשׁוּ֙ אֶת־הָאָ֣רֶץ הַטּוֹבָ֔ה וְהִנְחַלְתֶּ֛ם לִבְנֵיכֶ֥ם אַֽחֲרֵיכֶ֖ם עַד־עוֹלָֽם:

ט׳ וְאַתָּ֣ה שְׁלֹמֹֽה־בְנִ֡י דַּע֩ אֶת־אֱלֹהֵ֨י אָבִ֜יךָ וְעָֽבְדֵ֗הוּ בְּלֵ֚ב שָׁלֵם֙ וּבְנֶ֣פֶשׁ חֲפֵצָ֔ה כִּ֚י כָל־לְבָבוֹת֙ דּוֹרֵ֣שׁ יְהֹוָ֔ה וְכָל־יֵ֥צֶר מַֽחֲשָׁב֖וֹת מֵבִ֑ין אִֽם־תִּדְרְשֶׁ֙נּוּ֙ יִמָּ֣צֵא לָ֔ךְ וְאִם־תַּֽעַזְבֶ֖נּוּ יַזְנִֽיחֲךָ֥ לָעַֽד:

י׳ רְאֵ֣ה| עַתָּ֗ה כִּֽי־יְהֹוָ֛ה בָּ֧חַר בְּךָ֛ לִבְנֽוֹת־בַּ֥יִת לַמִּקְדָּ֖שׁ חֲזַ֥ק וַֽעֲשֵֽׂה:

י״א וַיִּתֵּ֣ן דָּוִ֣יד לִשְׁלֹמֹ֣ה בְנ֡וֹ אֶת־תַּבְנִ֣ית הָֽאוּלָם֩ וְאֶת־בָּ֨תָּ֜יו וְגַנְזַכָּ֧יו וַֽעֲלִיֹּתָ֛יו וַֽחֲדָרָ֥יו הַפְּנִימִ֖ים וּבֵ֥ית הַכַּפֹּֽרֶת:

י״ב וְתַבְנִ֗ית כֹּל֩ אֲשֶׁ֨ר הָיָ֚ה בָר֙וּחַ֙ עִמּ֔וֹ לְחַצְר֧וֹת בֵּֽית־יְהֹוָ֛ה וּלְכָל־הַלְּשָׁכ֖וֹת סָבִ֑יב לְאֹֽצְרוֹת֙ בֵּ֣ית הָֽאֱלֹהִ֔ים וּלְאֹֽצְר֖וֹת הַקֳּדָשִֽׁים:

י״ג וּלְמַחְלְקוֹת֙ הַכֹּֽהֲנִ֣ים וְהַֽלְוִיִּ֔ם וּלְכָל־מְלֶ֖אכֶת עֲבוֹדַ֣ת בֵּֽית־יְהֹוָ֑ה וּלְכָל־כְּלֵ֖י עֲבוֹדַ֥ת בֵּֽית־יְהֹוָֽה:

י״ד לַזָּהָ֚ב בַּמִּשְׁקָל֙ לַזָּהָ֔ב לְכָל־כְּלֵ֖י עֲבוֹדָ֣ה וַֽעֲבוֹדָ֑ה לְכֹ֨ל כְּלֵ֚י הַכֶּ֙סֶף֙ בְּמִשְׁקָ֔ל לְכָל־כְּלֵ֖י עֲבוֹדָ֥ה וַֽעֲבוֹדָֽה:

ט״ו וּמִשְׁקָ֞ל לִמְנֹר֣וֹת הַזָּהָ֗ב וְנֵֽרֹתֵיהֶם֙ זָהָ֔ב בְּמִשְׁקַל־מְנוֹרָ֥ה וּמְנוֹרָ֖ה וְנֵֽרֹתֶ֑יהָ וְלִמְנֹר֨וֹת הַכֶּ֚סֶף בְּמִשְׁקָל֙ לִמְנוֹרָ֣ה וְנֵֽרֹתֶ֔יהָ כַּֽעֲבוֹדַ֖ת מְנוֹרָ֥ה וּמְנוֹרָֽה:

ט״ז וְאֶת־הַזָּהָ֥ב מִשְׁקָ֛ל לְשֻׁלְחֲנ֥וֹת הַמַּֽעֲרֶ֖כֶת לְשֻׁלְחָ֣ן וְשֻׁלְחָ֑ן וְכֶ֖סֶף לְשֻׁלְחֲנ֥וֹת הַכָּֽסֶף:

י״ז וְהַמִּזְלָג֧וֹת וְהַמִּזְרָק֛וֹת וְהַקְּשָׂו‍ֹ֖ת זָהָ֣ב טָה֑וֹר וְלִכְפוֹרֵ֨י הַזָּהָ֚ב בְּמִשְׁקָל֙ לִכְפ֣וֹר וּכְפ֔וֹר וְלִכְפוֹרֵ֥י הַכֶּ֛סֶף בְּמִשְׁקָ֖ל לִכְפ֥וֹר וּכְפֽוֹר:

י״ח וּלְמִזְבַּ֧ח הַקְּטֹ֛רֶת זָהָ֥ב מְזֻקָּ֖ק בַּמִשְׁקָ֑ל וּלְתַבְנִ֣ית הַמֶרְכָּבָ֗ה הַכְּרֻבִ֚ים זָהָב֙ לְפֹ֣רְשִׂ֔ים וְסֹֽכְכִ֖ים עַל־אֲר֥וֹן בְּרִֽית־יְהֹוָֽה:

י״ט הַכֹּ֥ל בִּכְתָ֛ב מִיַּ֥ד יְהֹוָ֖ה עָלַ֣י הִשְׂכִּ֑יל כֹּ֖ל מַלְאֲכ֥וֹת הַתַּבְנִֽית:

כ׳ וַיֹּ֨אמֶר דָּוִ֜יד לִשְׁלֹמֹ֣ה בְנ֗וֹ חֲזַ֚ק וֶֽאֱמַץ֙ וַֽעֲשֵׂ֔ה אַל־תִּירָ֖א וְאַל־תֵּחָ֑ת כִּי֩ יְהֹוָ֨ה אֱלֹהִ֚ים אֱלֹהַי֙ עִמָּ֔ךְ לֹ֚א יַרְפְּךָ֙ וְלֹ֣א יַֽעַזְבֶ֔ךָּ עַד־לִכְל֕וֹת כָּל־מְלֶ֖אכֶת עֲבוֹדַ֥ת בֵּֽית־יְהֹוָֽה:

כ״א וְהִנֵּ֗ה מַחְלְקוֹת֙ הַכֹּֽהֲנִ֣ים וְהַֽלְוִיִּ֔ם לְכָל־עֲבוֹדַ֖ת בֵּ֣ית הָֽאֱלֹהִ֑ים וְעִמְּךָ֙ בְכָל־מְלָאכָ֜ה לְכָל־נָדִ֚יב בַּֽחָכְמָה֙ לְכָל־עֲבוֹדָ֔ה וְהַשָּׂרִ֥ים וְכָל־הָעָ֖ם לְכָל־דְּבָרֶֽיךָ: