Chapter 72

א׳ לִשְׁלֹמֹ֨ה | אֱלֹהִ֗ים מִ֖שְׁפָּטֶיךָ לְמֶ֣לֶךְ תֵּ֑ן וְצִדְקָֽתְךָ֥ לְבֶן־מֶֽלֶךְ:

ב׳ יָדִ֣ין עַמְּךָ֣ בְצֶ֑דֶק וַֽעֲנִיֶּ֥יךָ בְמִשְׁפָּֽט:

ג׳ יִשְׂא֚וּ הָרִ֓ים שָׁל֥וֹם לָעָ֑ם וּ֜גְבָע֗וֹת בִּצְדָקָֽה:

ד׳ יִשְׁפֹּ֚ט | עֲֽנִיֵּי־עָ֗ם י֖וֹשִׁיעַ לִבְנֵ֣י אֶבְי֑וֹן וִ֖ידַכֵּ֣א עוֹשֵֽׁק:

ה׳ יִֽירָא֥וּךָ עִם־שָׁ֣מֶשׁ וְלִפְנֵ֥י יָ֜רֵ֗חַ דּ֣וֹר דּוֹרִֽים:

ו׳ יֵרֵד כְּמָטָ֣ר עַל־גֵּ֑ז כִּ֜רְבִיבִ֗ים זַרְזִ֥יף אָֽרֶץ:

ז׳ יִֽפְרַ֣ח בְּיָמָ֣יו צַדִּ֑יק וְרֹ֥ב שָׁ֜ל֗וֹם עַד־בְּלִ֥י יָרֵֽחַ:

ח׳ וְיֵרְדְּ מִיָּ֣ם עַד־יָ֑ם וּ֜מִנָּהָ֗ר עַד־אַפְסֵי־אָֽרֶץ:

ט׳ לְפָנָיו יִכְרְע֣וּ צִיִּ֑ים וְ֜אֹֽיְבָ֗יו עָפָ֥ר יְלַחֵֽכוּ:

י׳ מַלְכֵ֚י תַרְשִׁ֣ישׁ וְ֖אִיִּים מִנְחָ֣ה יָשִׁ֑יבוּ מַלְכֵ֖י שְׁבָ֥א וּ֜סְבָ֗א אֶשְׁכָּ֥ר יַקְרִֽיבוּ:

י״א וְיִשְׁתַּֽחֲווּ־ל֥וֹ כָל־מְלָכִ֑ים כָּל־גּ֜וֹיִ֗ם יַֽעַבְדֽוּהוּ:

י״ב כִּֽי־יַ֖צִּיל אֶבְי֣וֹן מְשַׁוֵּ֑עַ וְ֜עָנִ֗י וְאֵין־עֹזֵ֥ר לֽוֹ:

י״ג יָחֹס עַל־דַּ֣ל וְאֶבְי֑וֹן וְנַפְשׁ֖וֹת אֶבְיוֹנִ֣ים יוֹשִֽׁיעַ:

י״ד מִתּ֣וֹךְ וּ֖מֵֽחָמָס יִגְאַ֣ל נַפְשָׁ֑ם וְיֵיקַ֖ר דָּמָ֣ם בְּעֵינָֽיו:

ט״ו וִיחִ֗י וְיִתֶּן־לוֹ֘ מִזְּהַ֪ב שְׁ֫בָ֥א וְיִתְפַּלֵּ֣ל בַּֽעֲד֣וֹ תָמִ֑יד כָּל־הַ֜יּ֗וֹם יְבָֽרֲכֶֽנְהוּ:

ט״ז יְהִ֚י פִסַּת־בַּ֨ר | בָּאָרֶץ֘ בְּרֹ֪אשׁ הָ֫רִ֥ים יִרְעַ֣שׁ כַּלְּבָנ֣וֹן פִּרְי֑וֹ וְיָצִ֥יצוּ מֵ֜עִ֗יר כְּעֵ֣שֶׂב הָאָֽרֶץ:

י״ז יְהִ֚י שְׁמ֨וֹ | לְעוֹלָ֗ם לִפְנֵ֣י שֶׁמֶשׁ֘ יִ֘נּ֪וֹן<span class="instructional ksiv"> (כתיב יִנֹּ֪ין) </span> שְׁמ֥וֹ וְיִתְבָּ֥רְכוּ ב֑וֹ כָּל־גּ֜וֹיִ֗ם יְאַשְּׁרֻֽהוּ:

י״ח בָּר֚וּךְ | יְהֹוָ֣ה אֱ֖לֹהִים אֱלֹהֵ֣י יִשְׂרָאֵ֑ל עֹשֵׂ֖ה נִפְלָא֣וֹת לְבַדּֽוֹ:

י״ט וּבָ֘ר֚וּךְ | שֵׁ֥ם כְּבוֹד֗וֹ לְע֫וֹלָ֥ם וְיִמָּלֵ֣א כְ֖בוֹדוֹ אֶת־כָּל־הָאָ֗רֶץ אָ֘מֵ֥ן | וְאָמֵֽן:

כ׳ כָּלּ֥וּ תְפִלּ֑וֹת דָּ֜וִ֗ד בֶּן־יִשָֽׁי: