Chapter 59

א׳ לַֽמְנַצֵּ֣חַ אַל־תַּשְׁחֵת֘ לְדָוִ֪ד מִ֫כְתָּ֥ם בִּשְׁלֹ֥חַ שָׁא֑וּל וַיִּשְׁמְר֥וּ אֶת־הַ֜בַּ֗יִת לַֽהֲמִיתֽוֹ:

ב׳ הַצִּילֵ֖נִי מֵאֹֽיְבַ֥י | אֱלֹהָ֑י מִמִּתְקֽוֹמְמַ֥י תְּשַׂגְּבֵֽנִי:

ג׳ הַצִּילֵנִי מִפֹּ֣עֲלֵי אָ֑וֶן וּמֵֽאַנְשֵׁ֥י דָ֜מִ֗ים הֽוֹשִׁיעֵֽנִי:

ד׳ כִּ֚י הִנֵּ֪ה אָֽרְב֡וּ לְנַפְשִׁ֗י יָג֣וּרוּ עָלַ֣י עַזִּ֑ים לֹֽא־פִשְׁעִ֖י וְלֹֽא־חַטָּאתִ֣י יְהֹוָֽה:

ה׳ בְּֽלִי־עָ֖ו‍ֹן יְ֖רֻצוּן וְיִכּוֹנָ֑נוּ ע֖וּרָה לִקְרָאתִ֣י וּרְאֵה:

ו׳ וְאַתָּ֚ה יְהֹוָ֨ה אֱלֹהִ֗ים | צְבָא֡וֹת אֱלֹ֘הֵ֚י יִשְׂרָאֵ֗ל הָקִ֗יצָה לִפְקֹ֥ד כָּֽל־הַגּוֹיִ֑ם אַל־תָּחֹ֨ן כָּל־בֹּ֖גְדֵי אָ֣וֶן סֶֽלָה:

ז׳ יָשׁ֣וּבוּ לָ֖עֶרֶב יֶֽהֱמ֥וּ כַכָּ֗לֶב וִיס֥וֹבְבוּ עִֽיר:

ח׳ הִנֵּ֚ה | יַבִּ֘יע֚וּן בְּפִיהֶ֗ם חֲרָב֥וֹת בְּשִׂפְתֽוֹתֵיהֶ֑ם כִּ֖י מִ֣י שֹׁמֵֽעַ:

ט׳ וְאַתָּ֣ה יְ֖הֹוָה תִּשְׂחַק־לָ֑מוֹ תִּ֜לְעַ֗ג לְכָל־גּוֹיִֽם:

י׳ עֻזּ֣וֹ אֵלֶ֣יךָ אֶשְׁמֹ֑רָה כִּ֥י אֱ֜לֹהִ֗ים מִשְׂגַּבִּֽי:

י״א אֱלֹהֵ֣י חַסְדִּ֣י<span class="instructional ksiv"> (כתיב חַסְדִּ֣ו) </span> יְקַדְּמֵ֑נִי אֱ֜לֹהִ֗ים יַרְאֵ֥נִי בְשֹֽׁרְרָֽי:

י״ב אַל־תַּֽהַרְגֵ֚ם | פֶּן־יִשְׁכְּח֬וּ עַמִּ֗י הֲנִיעֵ֣מוֹ בְ֖חֵֽילְךָ וְהֽוֹרִידֵ֑מוֹ מָ֖גִנֵּ֣נוּ אֲדֹנָֽי:

י״ג חַ֥טַּאת פִּ֗ימוֹ דְּֽבַר־שְׂפָ֫תֵ֥ימוֹ וְיִלָּֽכְד֥וּ בִגְאוֹנָ֑ם וּמֵֽאָלָ֖ה וּמִכַּ֣חַשׁ יְסַפֵּֽרוּ:

י״ד כַּלֵּ֥ה בְחֵמָה֘ כַּלֵּ֪ה וְֽאֵ֫ינֵ֥מוֹ וְיֵֽדְע֗וּ כִּי־אֱ֖לֹהִים מֹשֵׁ֣ל בְּיַֽעֲקֹ֑ב לְאַפְסֵ֖י הָאָ֣רֶץ סֶֽלָה:

ט״ו וְיָשׁ֣וּבוּ לָ֖עֶרֶב יֶֽהֱמ֥וּ כַכָּ֗לֶב וִיס֥וֹבְבוּ עִֽיר:

ט״ז הֵמָּה יְנִיע֣וּן<span class="instructional ksiv"> (כתיב יְנִוע֣וּן) </span> לֶֽאֱכֹ֑ל אִם־לֹ֥א יִ֜שְׂבְּע֗וּ וַיָּלִֽינוּ:

י״ז וַֽאֲנִ֚י | אָשִׁ֣יר עֻזֶּךָ֘ וַֽאֲרַנֵּ֥ן לַבֹּ֗קֶר חַ֫סְדֶּ֥ךָ כִּֽי־הָיִ֣יתָ מִשְׂגַּ֣ב לִ֑י וּ֜מָנ֗וֹס בְּי֣וֹם צַר־לִֽי:

י״ח עֻזִּי אֵלֶ֣יךָ אֲזַמֵּ֑רָה כִּֽי־אֱלֹהִ֥ים מִ֜שְׂגַּבִּ֗י אֱלֹהֵ֥י חַסְדִּֽי: