Chapter 120

א׳ שִׁ֗יר הַמַּֽ֫עֲל֥וֹת אֶל־יְ֖הֹוָה בַּצָּרָ֣תָה לִּ֑י קָ֜רָ֗אתִי וַֽיַּֽעֲנֵֽנִי:

ב׳ יְהֹוָ֗ה הַצִּ֣ילָה נַ֖פְשִׁי מִשְּׂפַת־שֶׁ֑קֶר מִלָּשׁ֥וֹן רְמִיָּֽה:

ג׳ מַה־יִּתֵּ֣ן לְ֖ךָ וּמַה־יֹּסִ֥יף לָ֗ךְ לָשׁ֥וֹן רְמִיָּֽה:

ד׳ חִצֵּ֣י גִבּ֣וֹר שְׁנוּנִ֑ים עִ֜֗ם גַּֽחֲלֵ֥י רְתָמִֽים:

ה׳ א֣וֹיָה לִ֖י כִּי־גַ֣רְתִּי מֶ֑שֶׁךְ שָׁ֜כַ֗נְתִּי עִם־אָֽהֳלֵ֥י קֵדָֽר:

ו׳ רַבַּת שָֽׁכְנָה־לָּ֣הּ נַפְשִׁ֑י עִ֜֗ם שׂוֹנֵ֥א שָׁלֽוֹם:

ז׳ אֲֽנִי־שָׁ֖לוֹם וְכִ֣י אֲדַבֵּ֑ר הֵ֜֗מָּה לַמִּלְחָמָֽה: