Yirmiyahu — Perek 15

ירמיה פרק ט״ו

א׳ וַיֹּ֚אמֶר יְהֹוָה֙ אֵלַ֔י אִם־יַֽעֲמֹ֨ד מֹשֶׁ֚ה וּשְׁמוּאֵל֙ לְפָנַ֔י אֵ֥ין נַפְשִׁ֖י אֶל־הָעָ֣ם הַזֶּ֑ה שַׁלַּ֥ח מֵעַל־פָּנַ֖י וְיֵצֵֽאוּ:

ב׳ וְהָיָ֛ה כִּֽי־יֹֽאמְר֥וּ אֵלֶ֖יךָ אָ֣נָה נֵצֵ֑א וְאָֽמַרְתָּ֨ אֲלֵיהֶ֜ם כֹּֽה־אָמַ֣ר יְהֹוָ֗ה אֲשֶׁ֨ר לַמָּ֚וֶת לַמָּ֙וֶת֙ וַֽאֲשֶׁ֚ר לַחֶ֙רֶב֙ לַחֶ֔רֶב וַֽאֲשֶׁ֚ר לָֽרָעָב֙ לָֽרָעָ֔ב וַֽאֲשֶּׁ֥ר לַשְּׁבִ֖י לַשֶּֽׁבִי:

ג׳ וּפָֽקַדְתִּ֨י עֲלֵיהֶ֜ם אַרְבַּ֚ע מִשְׁפָּחוֹת֙ נְאֻם־יְהֹוָ֔ה אֶת־הַחֶ֣רֶב לַֽהֲרֹ֔ג וְאֶת־הַכְּלָבִ֖ים לִסְחֹ֑ב וְאֶת־ע֧וֹף הַשָּׁמַ֛יִם וְאֶת־בֶּהֱמַ֥ת הָאָ֖רֶץ לֶאֱכֹ֥ל וּלְהַשְׁחִֽית:

ד׳ וּנְתַתִּ֣ים לְזַֽעֲוָ֔ה (כתיב לְזַֽוֲעָ֔ה) לְכֹ֖ל מַמְלְכ֣וֹת הָאָ֑רֶץ בִּ֠גְלַל מְנַשֶּׁ֚ה בֶן־יְחִזְקִיָּ֙הוּ֙ מֶ֣לֶךְ יְהוּדָ֔ה עַ֥ל אֲשֶׁר־עָשָׂ֖ה בִּירוּשָׁלִָֽם:

ה׳ כִּ֠י מִֽי־יַחְמֹ֚ל עָלַ֙יִךְ֙ יְר֣וּשָׁלִַ֔ם וּמִ֖י יָנ֣וּד לָ֑ךְ וּמִ֣י יָס֔וּר לִשְׁאֹ֥ל לְשָׁלֹ֖ם לָֽךְ:

ו׳ אַ֣תְּ נָטַ֥שְׁתְּ אֹתִ֛י נְאֻם־יְהֹוָ֖ה אָח֣וֹר תֵּלֵ֑כִי וָאַ֨ט אֶת־יָדִ֚י עָלַ֙יִךְ֙ וָֽאַשְׁחִיתֵ֔ךְ נִלְאֵ֖יתִי הִנָּחֵֽם:

ז׳ וָֽאֶזְרֵ֥ם בְּמִזְרֶ֖ה בְּשַֽׁעֲרֵ֣י הָאָ֑רֶץ שִׁכַּ֚לְתִּי אִבַּ֙דְתִּי֙ אֶת־עַמִּ֔י מִדַּרְכֵיהֶ֖ם לוֹא־שָֽׁבוּ:

ח׳ עָֽצְמוּ־לִ֚י אַלְמְנוֹתָיו֙ (כתיב אַלְמְנוֹתָו֙) מֵח֣וֹל יַמִּ֔ים הֵבֵ֨אתִי לָהֶ֥ם עַל־אֵ֛ם בָּח֖וּר שֹׁדֵ֣ד בַּֽצָּֽהֳרָ֑יִם הִפַּ֚לְתִּי עָלֶ֙יהָ֙ פִּתְאֹ֔ם עִ֖יר וּבֶהָלֽוֹת:

ט׳ אֻמְלְלָ֞ה יֹלֶ֣דֶת הַשִּׁבְעָ֗ה נָֽפְחָ֥ה נַפְשָׁ֛הּ בָּ֥א (כתיב בָּ֥אה) שִׁמְשָׁ֛הּ בְּעֹ֥ד יוֹמָ֖ם בּ֣וֹשָׁה וְחָפֵ֑רָה וּשְׁאֵֽרִיתָ֗ם לַחֶ֧רֶב אֶתֵּ֛ן לִפְנֵ֥י אֹֽיְבֵיהֶ֖ם נְאֻם־יְהֹוָֽה:

י׳ אֽוֹי־לִ֚י אִמִּי֨ כִּ֣י יְלִדְתִּ֗נִי אִ֥ישׁ רִ֛יב וְאִ֥ישׁ מָד֖וֹן לְכָל־הָאָ֑רֶץ לֹֽא־נָשִׁ֥יתִי וְלֹא־נָֽשׁוּ־בִ֖י כֻּלֹּ֥ה מְקַלְלָֽוְנִי:

י״א אָמַ֣ר יְהֹוָ֔ה אִם־לֹ֥א שֵֽׁרִיתִ֖יךָ (כתיב שֵֽׁרִותִ֖ךָ) לְט֑וֹב אִם־ל֣וֹא | הִפְגַּ֣עְתִּי בְךָ֗ בְּעֵ֥ת־רָעָ֛ה וּבְעֵ֥ת צָרָ֖ה אֶת־הָֽאֹיֵֽב:

י״ב הֲיָרֹ֨עַ בַּרְזֶ֧ל | בַּרְזֶ֛ל מִצָּפ֖וֹן וּנְחֹֽשֶׁת:

י״ג חֵילְךָ֧ וְאוֹצְרֹתֶ֛יךָ לָבַ֥ז אֶתֵּ֖ן לֹ֣א בִמְחִ֑יר וּבְכָל־חַטֹּאותֶ֖יךָ וּבְכָל־גְּבוּלֶֽיךָ:

י״ד וְהַֽעֲבַרְתִּי֙ אֶת־אֹ֣יְבֶ֔יךָ בְּאֶ֖רֶץ לֹ֣א יָדָ֑עְתָּ כִּֽי־אֵ֛שׁ קָֽדְחָ֥ה בְאַפִּ֖י עֲלֵיכֶ֥ם תּוּקָֽד:

ט״ו אַתָּ֧ה יָדַ֣עְתָּ יְהֹוָ֗ה זָכְרֵ֚נִי וּפָקְדֵ֙נִי֙ וְהִנָּ֚קֶם לִי֙ מֵרֹ֣דְפַ֔י אַל־לְאֶ֥רֶךְ אַפְּךָ֖ תִּקָּחֵ֑נִי דַּ֕ע שְׂאֵתִ֥י עָלֶ֖יךָ חֶרְפָּֽה:

ט״ז נִמְצְא֚וּ דְבָרֶ֙יךָ֙ וָאֹ֣כְלֵ֔ם וַיְהִ֚י דְבָֽרְךָ֙ (כתיב דְבָֽרְיךָ֙) לִ֔י לְשָׂשׂ֖וֹן וּלְשִׂמְחַ֣ת לְבָבִ֑י כִּֽי־נִקְרָ֚א שִׁמְךָ֙ עָלַ֔י יְהֹוָ֖ה אֱלֹהֵ֥י צְבָאֽוֹת:

י״ז לֹֽא־יָשַׁ֥בְתִּי בְסוֹד־מְשַֽׂחֲקִ֖ים וָֽאֶעְלֹ֑ז מִפְּנֵ֚י יָֽדְךָ֙ בָּדָ֣ד יָשַׁ֔בְתִּי כִּֽי־זַ֖עַם מִלֵּאתָֽנִי:

י״ח לָ֣מָּה הָיָ֚ה כְאֵבִי֙ נֶ֔צַח וּמַכָּתִ֖י אֲנוּשָׁ֑ה֙ מֵֽאֲנָה֙ הֵֽרָפֵ֔א הָי֨וֹ תִֽהְיֶ֥ה לִי֙ כְּמ֣וֹ אַכְזָ֔ב מַ֖יִם לֹ֥א נֶֽאֱמָֽנוּ:

י״ט לָכֵ֞ן כֹּֽה־אָמַ֣ר יְהֹוָ֗ה אִם־תָּשׁ֚וּב וַֽאֲשִֽׁיבְךָ֙ לְפָנַ֣י תַּֽעֲמֹ֔ד וְאִם־תּוֹצִ֥יא יָקָ֛ר מִזּוֹלֵ֖ל כְּפִ֣י תִֽהְיֶ֑ה יָשֻׁ֚בוּ הֵ֙מָּה֙ אֵלֶ֔יךָ וְאַתָּ֖ה לֹֽא־תָשׁ֥וּב אֲלֵיהֶֽם:

כ׳ וּנְתַתִּ֜יךָ לָעָ֣ם הַזֶּ֗ה לְחוֹמַ֚ת נְח֙שֶׁת֙ בְּצוּרָ֔ה וְנִלְחֲמ֥וּ אֵלֶ֖יךָ וְלֹא־י֣וּכְלוּ לָ֑ךְ כִּֽי־אִתְּךָ֥ אֲנִ֛י לְהוֹשִֽׁיֽעֲךָ֥ וּלְהַצִּילֶ֖ךָ נְאֻם־יְהֹוָֽה:

כ״א וְהִצַּלְתִּ֖יךָ מִיַּ֣ד רָעִ֑ים וּפְדִתִ֖יךָ מִכַּ֥ף עָֽרִצִֽים: