Tehillim — Perek 88

א׳ שִׁ֥יר מִזְמ֗וֹר לִבְנֵ֫י קֹ֥רַח לַֽמְנַצֵּ֣חַ עַל־מַֽחֲלַ֣ת לְעַנּ֑וֹת מַ֜שְׂכִּ֗יל לְהֵימָ֥ן הָֽאֶזְרָחִֽי:

ב׳ יְהֹוָה אֱלֹהֵ֣י יְשֽׁוּעָתִ֑י י֚וֹם צָעַ֖קְתִּי בַלַּ֣יְלָה נֶגְדֶּֽךָ:

ג׳ תָּב֣וֹא לְ֖פָנֶֽיךָ תְּפִלָּתִ֑י הַטֵּ֥ה אָ֜זְנְךָ֗ לְרִנָּתִֽי:

ד׳ כִּי־שָֽׂבְעָ֣ה בְרָע֣וֹת נַפְשִׁ֑י וְחַ֜יַּ֗י לִשְׁא֥וֹל הִגִּֽיעוּ:

ה׳ נֶחְשַׁבְתִּי עִם־י֣וֹרְדֵי ב֑וֹר הָ֜יִ֗יתִי כְּגֶ֣בֶר אֵין־אֱיָֽל:

ו׳ בַּמֵּתִ֗ים חָ֫פְשִׁ֥י כְּמ֚וֹ חֲלָלִ֨ים | שֹׁ֥כְבֵי קֶ֗בֶר אֲשֶׁ֚ר לֹ֣א זְכַרְתָּ֣ם ע֑וֹד וְ֜הֵ֗מָּה מִיָּֽדְךָ֥ נִגְזָֽרוּ:

ז׳ שַׁתַּנִי בְּב֣וֹר תַּחְתִּיּ֑וֹת בְּ֜מַֽחֲשַׁכִּ֗ים בִּמְצֹלֽוֹת:

ח׳ עָלַי סָֽמְכָ֣ה חֲמָתֶ֑ךָ וְכָל־מִ֜שְׁבָּרֶ֗יךָ עִנִּ֥יתָ סֶּֽלָה:

ט׳ הִרְחַ֥קְתָּ מְיֻדָּעַ֗י מִ֫מֶּ֥נִּי שַׁתַּ֣נִי תֽוֹעֵב֣וֹת לָ֑מוֹ כָּ֜לֻ֗א וְלֹ֣א אֵצֵֽא:

י׳ עֵינִ֥י דָֽאֲבָ֗ה מִנִּ֫י עֹ֥נִי קְרָאתִ֣יךָ יְהֹוָ֣ה בְּכָל־י֑וֹם שִׁטַּ֖חְתִּי אֵלֶ֣יךָ כַפָּֽי:

י״א הֲלַמֵּתִ֥ים תַּֽעֲשֶׂה־פֶּ֑לֶא אִם רְפָאִ֥ים יָ֜ק֗וּמוּ יוֹד֥וּךָ סֶּֽלָה:

י״ב הַיְסֻפַּ֣ר בַּקֶּ֣בֶר חַסְדֶּ֑ךָ אֱ֜מוּנָֽתְךָ֗ בָּֽאֲבַדּֽוֹן:

י״ג הֲיִוָּדַ֣ע בַּחֹ֣שֶׁךְ פִּלְאֶ֑ךָ וְ֜צִדְקָֽתְךָ֗ בְּאֶ֣רֶץ נְשִׁיָּֽה:

י״ד וַֽאֲנִ֚י | אֵלֶ֣יךָ יְהֹוָ֣ה שִׁוַּ֑עְתִּי וּ֜בַבֹּ֗קֶר תְּפִלָּתִ֥י תְקַדְּמֶֽךָּ:

ט״ו לָמָ֣ה יְ֖הֹוָה תִּזְנַ֣ח נַפְשִׁ֑י תַּסְתִּ֖יר פָּנֶ֣יךָ מִמֶּֽנִּי:

ט״ז עָ֘נִ֚י אֲנִ֣י וְגוֵֹ֣עַ מִנֹּ֑עַר נָשָׂ֖אתִי אֵמֶ֣יךָ אָפֽוּנָה:

י״ז עָלַי עָֽבְר֣וּ חֲרוֹנֶ֑יךָ בִּ֖עוּתֶ֣יךָ צִמְּתֻתֽוּנִי:

י״ח סַבּ֣וּנִי כַ֖מַּיִם כָּל־הַיּ֑וֹם הִקִּ֖יפוּ עָלַ֣י יָֽחַד:

י״ט הִרְחַ֣קְתָּ מִ֖מֶּנִּי אֹהֵ֣ב וָרֵ֑עַ מְיֻדָּעַ֥י מַחְשָֽׁךְ: