Tehillim — Perek 78

א׳ מַשְׂכִּ֗יל לְאָ֫סָ֥ף הַֽאֲזִ֣ינָה עַ֖מִּי תּֽוֹרָתִ֑י הַטּ֥וּ אָ֜זְנְכֶ֗ם לְאִמְרֵי־פִֽי:

ב׳ אֶפְתְּחָ֣ה בְמָשָׁ֣ל פִּ֑י אַבִּ֥יעָה חִ֜יד֗וֹת מִנִּי־קֶֽדֶם:

ג׳ אֲשֶׁ֣ר שָׁ֖מַעְנוּ וַנֵּֽדָעֵ֑ם וַֽ֜אֲבוֹתֵ֗ינוּ סִפְּרוּ־לָֽנוּ:

ד׳ לֹ֚א נְכַחֵ֨ד | מִבְּנֵיהֶ֗ם לְד֥וֹר אַֽחֲר֗וֹן מְ֖סַפְּרִים תְּהִלּ֣וֹת יְהֹוָ֑ה וֶֽעֱזוּז֥וֹ וְ֜נִפְלְאֹתָ֗יו אֲשֶׁ֣ר עָשָֽׂה:

ה׳ וַיָּ֚קֶם עֵד֨וּת | בְּיַֽעֲקֹ֗ב וְתוֹרָה֘ שָׂ֪ם בְּיִשְׂרָ֫אֵ֥ל אֲשֶׁ֣ר צִוָּ֣ה אֶת־אֲבוֹתֵ֑ינוּ לְ֜הוֹדִיעָ֗ם לִבְנֵיהֶֽם:

ו׳ לְמַ֚עַן יֵֽדְע֨וּ | דּ֣וֹר אַֽ֖חֲרוֹן בָּנִ֣ים יִוָּלֵ֑דוּ יָ֜קֻ֗מוּ וִֽיסַפְּר֥וּ לִבְנֵיהֶֽם:

ז׳ וְיָשִׂ֥ימוּ בֵֽאלֹהִ֗ים כִּ֫סְלָ֥ם וְלֹ֣א יִ֖שְׁכְּחוּ מַֽעַלְלֵי־אֵ֑ל וּמִצְו‍ֹתָ֥יו יִנְצֹֽרוּ:

ח׳ וְלֹ֚א יִֽהְי֨וּ | כַּֽאֲבוֹתָ֗ם דּוֹר֘ סוֹרֵ֪ר וּמֹ֫רֶ֥ה דּ֖וֹר לֹֽא־הֵכִ֣ין לִבּ֑וֹ וְלֹֽא־נֶֽאֶמְנָ֖ה אֶת־אֵ֣ל רוּחֽוֹ:

ט׳ בְּֽנֵי־אֶפְרַ֗יִם נֹֽשְׁקֵ֥י רֽוֹמֵי־קָ֑שֶׁת הָֽ֜פְכ֗וּ בְּי֣וֹם קְרָֽב:

י׳ לֹ֣א שָֽׁ֖מְרוּ בְּרִ֣ית אֱלֹהִ֑ים וּ֜בְתֽוֹרָת֗וֹ מֵֽאֲנ֥וּ לָלֶֽכֶת:

י״א וַיִּשְׁכְּח֥וּ עֲלִֽילוֹתָ֑יו וְ֜נִפְלְאוֹתָ֗יו אֲשֶׁ֣ר הֶרְאָֽם:

י״ב נֶ֣גֶד אֲ֖בוֹתָם עָ֣שָׂה פֶ֑לֶא בְּאֶ֖רֶץ מִצְרַ֣יִם שְׂדֵה־צֹֽעַן:

י״ג בָּ֣קַע יָ֖ם וַיַּֽעֲבִירֵ֑ם וַיַּצֶּב־מַ֥יִם כְּמוֹ־נֵֽד:

י״ד וַיַּנְחֵ֣ם בֶּֽעָנָ֣ן יוֹמָ֑ם וְכָל־הַ֜לַּ֗יְלָה בְּא֣וֹר אֵֽשׁ:

ט״ו יְבַקַּ֣ע צֻ֖רִים בַּמִּדְבָּ֑ר וַ֜יַּ֗שְׁקְ כִּתְהֹמ֥וֹת רַבָּֽה:

ט״ז וַיּוֹצִ֣א נֽוֹזְלִ֣ים מִסָּ֑לַע וַיּ֖וֹרֶד כַּנְּהָר֣וֹת מָֽיִם:

י״ז וַיּוֹסִ֣יפוּ ע֖וֹד לַֽחֲטֹא־ל֑וֹ לַמְר֥וֹת עֶ֜לְי֗וֹן בַּצִּיָּֽה:

י״ח וַיְנַסּוּ־אֵ֥ל בִּלְבָבָ֑ם לִשְׁאָל־אֹ֥כֶל לְנַפְשָֽׁם:

י״ט וַֽיְדַבְּר֗וּ בֵּֽאלֹ֫הִ֥ים אָ֖מְרוּ הֲי֣וּכַל אֵ֑ל לַֽעֲרֹ֥ךְ שֻׁ֜לְחָ֗ן בַּמִּדְבָּֽר:

כ׳ הֵ֚ן הִכָּה־צוּ֗ר | וַיָּז֣וּבוּ מַיִם֘ וּנְחָלִ֪ים יִ֫שְׁטֹ֥פוּ הֲגַם־לֶ֖חֶם י֣וּכַל תֵּ֑ת אִם־יָכִ֥ין שְׁאֵ֣ר לְעַמּֽוֹ:

כ״א לָכֵ֚ן | שָׁמַ֣ע יְהֹוָה֘ וַיִּתְעַבָּ֥ר וְאֵ֣שׁ נִשְּׂקָ֣ה בְיַֽעֲקֹ֑ב וְגַם־אַ֜֗ף עָלָ֥ה בְיִשְׂרָאֵֽל:

כ״ב כִּ֚י לֹ֣א הֶֽ֖אֱמִינוּ בֵּֽאלֹהִ֑ים וְלֹ֥א בָֽ֜טְח֗וּ בִּישֽׁוּעָתֽוֹ:

כ״ג וַיְצַ֣ו שְׁחָקִ֣ים מִמָּ֑עַל וְדַלְתֵ֖י שָׁמַ֣יִם פָּתָֽח:

כ״ד וַיַּמְטֵ֬ר עֲלֵיהֶ֣ם מָ֣ן לֶֽאֱכֹ֑ל וּדְגַ֣ן שָׁ֜מַ֗יִם נָ֣תַן לָֽמוֹ:

כ״ה לֶ֣חֶם אַ֖בִּירִים אָ֣כַל אִ֑ישׁ צֵידָ֬ה שָׁלַ֖ח לָהֶ֣ם לָשֽׂבַע:

כ״ו יַסַּ֣ע קָ֖דִים בַּשָּׁמָ֑יִם וַיְנַהֵ֖ג בְּעֻזּ֣וֹ תֵימָֽן:

כ״ז וַיַּמְטֵ֬ר עֲלֵיהֶ֣ם כֶּֽעָפָ֣ר שְׁאֵ֑ר וּכְח֥וֹל יַ֜מִּ֗ים ע֣וֹף כָּנָֽף:

כ״ח וַיַּפֵּל בְּקֶ֣רֶב מַֽחֲנֵ֑הוּ סָ֜בִ֗יב לְמִשְׁכְּנֹתָֽיו:

כ״ט וַיֹּֽאכְל֣וּ וַיִּשְׂבְּע֣וּ מְאֹ֑ד וְ֜תַֽאֲוָתָ֗ם יָבִ֥א לָהֶֽם:

ל׳ לֹא־זָר֥וּ מִתַּֽאֲוָתָ֑ם ע֜֗וֹד אָכְלָ֥ם בְּפִיהֶֽם:

ל״א וְאַ֚ף אֱלֹהִ֨ים | עָ֘לָ֚ה בָהֶ֗ם וַֽ֖יַּֽהֲרֹג בְּמִשְׁמַנֵּיהֶ֑ם וּבַֽחוּרֵ֖י יִשְׂרָאֵ֣ל הִכְרִֽיעַ:

ל״ב בְּכָל־זֹ֖את חָֽטְאוּ־ע֑וֹד וְלֹ֥א הֶֽ֜אֱמִ֗ינוּ בְּנִפְלְאוֹתָֽיו:

ל״ג וַיְכַל־בַּהֶ֥בֶל יְמֵיהֶ֑ם וּ֜שְׁנוֹתָ֗ם בַּבֶּֽהָלָֽה:

ל״ד אִם־הֲרָגָ֥ם וּדְרָשׁ֑וּהוּ וְ֜שָׁ֗בוּ וְשִֽׁחֲרוּ־אֵֽל:

ל״ה וַֽיִּזְכְּרוּ כִּֽי־אֱלֹהִ֣ים צוּרָ֑ם וְאֵ֥ל עֶ֜לְי֗וֹן גֹּֽאֲלָֽם:

ל״ו וַיְפַתּ֥וּהוּ בְּפִיהֶ֑ם וּ֜בִלְשׁוֹנָ֗ם יְכַזְּבוּ־לֽוֹ:

ל״ז וְלִבָּם לֹֽא־נָכ֣וֹן עִמּ֑וֹ וְלֹ֥א נֶֽ֜אֶמְנ֗וּ בִּבְרִיתֽוֹ:

ל״ח וְה֚וּא רַח֨וּם | יְכַפֵּ֥ר עָו‍ֹ֘ן וְלֹ֪א יַ֫שְׁחִ֥ית וְהִרְבָּ֣ה לְהָשִׁ֣יב אַפּ֑וֹ וְלֹ֥א יָ֜עִיר כָּל־חֲמָתֽוֹ:

ל״ט וַיִּזְכֹּר כִּֽי־בָשָׂ֣ר הֵ֑מָּה ר֥וּחַ ה֜וֹלֵ֗ךְ וְלֹ֣א יָשֽׁוּב:

מ׳ כַּמָּ֣ה יַ֖מְרוּהוּ בַמִּדְבָּ֑ר יַֽ֜עֲצִיב֗וּהוּ בִּֽישִׁימֽוֹן:

מ״א וַיָּשׁ֣וּבוּ וַיְנַסּ֣וּ אֵ֑ל וּקְד֖וֹשׁ יִשְׂרָאֵ֣ל הִתְוֽוּ:

מ״ב לֹא־זָֽכְר֥וּ אֶת־יָד֑וֹ י֜֗וֹם אֲשֶׁר־פָּדָ֥ם מִנִּי־צָֽר:

מ״ג אֲשֶׁר־שָׂ֣ם בְּ֖מִצְרַיִם אֹֽתוֹתָ֑יו וּ֜מֽוֹפְתָ֗יו בִּשְׂדֵה־צֹֽעַן:

מ״ד וַיַּֽהֲפֹ֣ךְ לְ֖דָם יְאֹֽרֵיהֶ֑ם וְ֜נֽוֹזְלֵיהֶ֗ם בַּל־יִשְׁתָּיֽוּן:

מ״ה יְשַׁלַּ֬ח בָּהֶ֣ם עָ֖רֹב וַיֹּֽאכְלֵ֑ם וּ֜צְפַרְדֵּ֗עַ וַתַּשְׁחִיתֵֽם:

מ״ו וַיִּתֵּ֣ן לֶֽחָסִ֣יל יְבוּלָ֑ם וִֽ֜יגִיעָ֗ם לָֽאַרְבֶּֽה:

מ״ז יַֽהֲרֹ֣ג בַּבָּרָ֣ד גַּפְנָ֑ם וְ֜שִׁקְמוֹתָ֗ם בַּֽחֲנָמַֽל:

מ״ח וַיַּסְגֵּ֣ר לַבָּרָ֣ד בְּעִירָ֑ם וּ֜מִקְנֵיהֶ֗ם לָֽרְשָׁפִֽים:

מ״ט יְשַׁלַּח־בָּ֨ם | חֲר֬וֹן אַפּ֗וֹ עֶבְרָ֣ה וָזַ֣עַם וְצָרָ֑ה מִ֜שְׁלַ֗חַת מַלְאֲכֵ֥י רָעִֽים:

נ׳ יְפַלֵּ֥ס נָתִ֗יב לְאַ֫פּ֥וֹ לֹֽא־חָשַׂ֣ךְ מִמָּ֣וֶת נַפְשָׁ֑ם וְ֜חַיָּתָ֗ם לַדֶּ֥בֶר הִסְגִּֽיר:

נ״א וַיַּ֣ךְ כָּל־בְּכ֣וֹר בְּמִצְרָ֑יִם רֵאשִׁ֥ית א֜וֹנִ֗ים בְּאָֽהֳלֵי־חָֽם:

נ״ב וַיַּסַּ֣ע כַּצֹּ֣אן עַמּ֑וֹ וַֽיְנַֽהֲגֵ֥ם כָּ֜עֵ֗דֶר בַּמִּדְבָּֽר:

נ״ג וַיַּנְחֵ֣ם לָ֖בֶטַח וְלֹ֣א פָחָ֑דוּ וְאֶת־אֽ֜וֹיְבֵיהֶ֗ם כִּסָּ֥ה הַיָּֽם:

נ״ד וַיְבִיאֵם אֶל־גְּב֣וּל קָדְשׁ֑וֹ הַר־זֶ֜֗ה קָֽנְתָ֥ה יְמִינֽוֹ:

נ״ה וַיְגָ֚רֶשׁ מִפְּנֵיהֶ֨ם | גּוֹיִ֗ם וַ֖יַּפִּילֵם בְּחֶ֣בֶל נַֽחֲלָ֑ה וַיַּשְׁכֵּ֥ן בְּ֜אָֽהֳלֵיהֶ֗ם שִׁבְטֵ֥י יִשְׂרָאֵֽל:

נ״ו וַיְנַסּ֣וּ וַ֖יַּמְרוּ אֶת־אֱלֹהִ֣ים עֶלְי֑וֹן וְ֜עֵֽדוֹתָ֗יו לֹ֣א שָׁמָֽרוּ:

נ״ז וַיִּסֹּ֣גוּ וַֽ֖יִּבְגְּדוּ כַּֽאֲבוֹתָ֑ם נֶ֜הְפְּכ֗וּ כְּקֶ֣שֶׁת רְמִיָּֽה:

נ״ח וַיַּכְעִיס֥וּהוּ בְּבָֽמוֹתָ֑ם וּ֜בִפְסִֽילֵיהֶ֗ם יַקְנִיאֽוּהוּ:

נ״ט שָׁמַ֣ע אֱ֖לֹהִים וַיִּתְעַבָּ֑ר וַיִּמְאַ֥ס מְ֜אֹ֗ד בְּיִשְׂרָאֵֽל:

ס׳ וַיִּטֹּשׁ מִשְׁכַּ֣ן שִׁל֑וֹ אֹ֜֗הֶל שִׁכֵּ֥ן בָּֽאָדָֽם:

ס״א וַיִּתֵּ֣ן לַשְּׁבִ֣י עֻזּ֑וֹ וְתִפְאַרְתּ֥וֹ בְיַד־צָֽר:

ס״ב וַיַּסְגֵּ֣ר לַחֶ֣רֶב עַמּ֑וֹ וּ֜בְנַֽחֲלָת֗וֹ הִתְעַבָּֽר:

ס״ג בַּֽחוּרָ֥יו אָֽכְלָה־אֵ֑שׁ וּ֜בְתוּלֹתָ֗יו לֹ֣א הוּלָּֽלוּ:

ס״ד כֹּהֲנָיו בַּחֶ֣רֶב נָפָ֑לוּ וְ֜אַלְמְנֹתָ֗יו לֹ֣א תִבְכֶּֽינָה:

ס״ה וַיִּקַ֖ץ כְּיָשֵׁ֥ן | אֲדֹנָ֑י כְּ֜גִבּ֗וֹר מִתְרוֹנֵ֥ן מִיָּֽיִן:

ס״ו וַיַּ֣ךְ צָרָ֣יו אָח֑וֹר חֶרְפַּ֥ת ע֜וֹלָ֗ם נָ֣תַן לָֽמוֹ:

ס״ז וַיִּמְאַס בְּאֹ֣הֶל יוֹסֵ֑ף וּבְשֵׁ֥בֶט אֶ֜פְרַ֗יִם לֹ֣א בָחָֽר:

ס״ח וַיִּבְחַר אֶת־שֵׁ֣בֶט יְהוּדָ֑ה אֶת־הַר־צִ֜יּ֗וֹן אֲשֶׁ֣ר אָהֵֽב:

ס״ט וַיִּ֣בֶן כְּמוֹ־רָ֖מִים מִקְדָּשׁ֑וֹ כְּ֜אֶ֗רֶץ יְסָדָ֥הּ לְעוֹלָֽם:

ע׳ וַיִּבְחַר בְּדָוִ֣ד עַבְדּ֑וֹ וַ֜יִּקָּחֵ֗הוּ מִמִּכְלְאֹ֥ת צֹֽאן:

ע״א מֵֽאַחַ֥ר עָל֗וֹת הֱבִ֫יא֥וֹ לִ֖רְעוֹת בְּיַֽעֲקֹ֣ב עַמּ֑וֹ וּ֜בְיִשְׂרָאֵ֗ל נַֽחֲלָתֽוֹ:

ע״ב וַיִּרְעֵם כְּתֹ֣ם לְבָב֑וֹ וּבִתְבוּנ֖וֹת כַּפָּ֣יו יַנְחֵֽם: