Nechemiah — Perek 3

נחמיה פרק ג׳

א׳ וַיָּ֡קָם אֶלְיָשִׁיב֩ הַכֹּהֵ֨ן הַגָּד֜וֹל וְאֶחָ֣יו הַכֹּֽהֲנִ֗ים וַיִּבְנוּ֙ אֶת־שַׁ֣עַר הַצֹּ֔אן הֵ֣מָּה קִדְּשׁ֔וּהוּ וַיַּֽעֲמִ֖ידוּ דַּלְתֹתָ֑יו וְעַד־מִגְדַּ֚ל הַמֵּאָה֙ קִדְּשׁ֔וּהוּ עַ֖ד מִגְדַּ֥ל חֲנַנְאֵֽל:

ב׳ וְעַל־יָד֥וֹ בָנ֖וּ אַנְשֵׁ֣י יְרֵח֑וֹ וְעַל־יָד֣וֹ בָנָ֔ה זַכּ֖וּר בֶּן־אִמְרִֽי:

ג׳ וְאֵת֙ שַׁ֣עַר הַדָּגִ֔ים בָּנ֖וּ בְּנֵ֣י הַסְּנָאָ֑ה הֵ֣מָּה קֵר֔וּהוּ וַיַּֽעֲמִ֙ידוּ֙ דַּלְתֹתָ֔יו מַנְעוּלָ֖יו וּבְרִיחָֽיו:

ד׳ וְעַל־יָדָ֣ם הֶֽחֱזִ֗יק מְרֵמ֚וֹת בֶּן־אֽוּרִיָּה֙ בֶּן־הַקּ֔וֹץ וְעַל־יָדָ֣ם הֶֽחֱזִ֔יק מְשֻׁלָּ֥ם בֶּן־בֶּֽרֶכְיָ֖ה בֶּן־מְשֵֽׁיזַבְאֵ֑ל וְעַל־יָדָ֣ם הֶֽחֱזִ֔יק צָד֖וֹק בֶּֽן־בַּֽעֲנָֽא:

ה׳ וְעַל־יָדָ֖ם הֶֽחֱזִ֣יקוּ הַתְּקוֹעִ֑ים וְאַדִּֽירֵיהֶם֙ לֹֽא־הֵבִ֣יאוּ צַוָּרָ֔ם בַּֽעֲבֹדַ֖ת אֲדֹנֵיהֶֽם:

ו׳ וְאֵת֩ שַׁ֨עַר הַיְשָׁנָ֜ה הֶֽחֱזִ֗יקוּ יֽוֹיָדָע֙ בֶּן־פָּסֵ֔חַ וּמְשֻׁלָּ֖ם בֶּן־בְּסֽוֹדְיָ֑ה הֵ֣מָּה קֵר֔וּהוּ וַיַּֽעֲמִ֙ידוּ֙ דַּלְתֹתָ֔יו וּמַנְעֻלָ֖יו וּבְרִיחָֽיו:

ז׳ וְעַל־יָדָ֨ם הֶֽחֱזִ֜יק מְלַטְיָ֣ה הַגִּבְעֹנִ֗י וְיָדוֹן֙ הַמֵּרֹ֣נֹתִ֔י אַנְשֵׁ֥י גִבְע֖וֹן וְהַמִּצְפָּ֑ה לְכִסֵּ֕א פַּחַ֖ת עֵ֥בֶר הַנָּהָֽר:

ח׳ עַל־יָד֣וֹ הֶֽחֱזִ֗יק עֻזִּיאֵ֚ל בֶּן־חַרְהֲיָה֙ צֽוֹרְפִ֔ים וְעַל־יָד֣וֹ הֶֽחֱזִ֔יק חֲנַנְיָ֖ה בֶּן־הָֽרַקָּחִ֑ים וַיַּֽעַזְבוּ֙ יְר֣וּשָׁלִַ֔ם עַ֖ד הַֽחוֹמָ֥ה הָֽרְחָבָֽה:

ט׳ וְעַל־יָדָ֚ם הֶֽחֱזִיק֙ רְפָיָ֣ה בֶן־ח֔וּר שַׂ֕ר חֲצִ֖י פֶּ֥לֶךְ יְרֽוּשָׁלִָֽם:

י׳ וְעַל־יָדָ֧ם הֶֽחֱזִ֛יק יְדָיָ֥ה בֶן־חֲרוּמַ֖ף וְנֶ֣גֶד בֵּית֑וֹ וְעַל־יָד֣וֹ הֶֽחֱזִ֔יק חַטּ֖וּשׁ בֶּן־חֲשַׁבְנְיָֽה:

י״א מִדָּ֣ה שֵׁנִ֗ית הֶֽחֱזִיק֙ מַלְכִּיָּ֣ה בֶן־חָרִ֔ם וְחַשּׁ֖וּב בֶּן־פַּחַ֣ת מוֹאָ֑ב וְאֵ֖ת מִגְדַּ֥ל הַתַּנּוּרִֽים:

י״ב וְעַל־יָד֣וֹ הֶֽחֱזִ֗יק שַׁלּוּם֙ בֶּן־הַלּוֹחֵ֔שׁ שַׂ֕ר חֲצִ֖י פֶּ֣לֶךְ יְרֽוּשָׁלִָ֑ם ה֖וּא וּבְנוֹתָֽיו:

י״ג אֵת֩ שַׁ֨עַר הַגַּ֜יְא הֶֽחֱזִ֣יק חָנוּן֘ וְיֹֽשְׁבֵ֣י זָנוֹחַ֒ הֵ֣מָּה בָנ֔וּהוּ וַיַּֽעֲמִ֙ידוּ֙ דַּלְתֹתָ֔יו מַנְעֻלָ֖יו וּבְרִיחָ֑יו וְאֶ֚לֶף אַמָּה֙ בַּֽחוֹמָ֔ה עַ֖ד שַׁ֥עַר הָֽשְׁפֽוֹת:

י״ד וְאֵ֣ת | שַׁ֣עַר הָֽאַשְׁפּ֗וֹת הֶֽחֱזִיק֙ מַלְכִּיָּ֣ה בֶן־רֵכָ֔ב שַׂ֖ר פֶּ֣לֶךְ בֵּֽית־הַכָּ֑רֶם ה֣וּא יִבְנֶ֔נּוּ וְיַֽעֲמִיד֙ דַּלְתֹתָ֔יו מַנְעֻלָ֖יו וּבְרִיחָֽיו:

ט״ו וְאֵת֩ שַׁ֨עַר הָעַ֜יִן הֶֽ֠חֱזִיק שַׁלּ֣וּן בֶּן־כָּל־חֹזֶה֘ שַׂ֣ר פֶּ֣לֶךְ הַמִּצְפָּה֒ ה֚וּא יִבְנֶ֙נּוּ֙ וִֽיטַלְלֶ֣נּוּ וְיַֽעֲמִיד֙ (כתיב וְיַֽעֲמִידו֙) דַּלְתֹתָ֔יו מַנְעֻלָ֖יו וּבְרִיחָ֑יו וְ֠אֵת חוֹמַ֞ת בְּרֵכַ֚ת הַשֶּׁ֙לַח֙ לְגַן־הַמֶּ֔לֶךְ וְעַד־הַמַּֽעֲל֔וֹת הַיּֽוֹרְד֖וֹת מֵעִ֥יר דָּוִֽיד:

ט״ז אַֽחֲרָ֚יו הֶֽחֱזִיק֙ נְחֶמְיָ֣ה בֶן־עַזְבּ֔וּק שַׂ֕ר חֲצִ֖י פֶּ֣לֶךְ בֵּֽית־צ֑וּר עַד־נֶ֙גֶד֙ קִבְרֵ֣י דָוִ֔יד וְעַד־הַבְּרֵכָה֙ הָֽעֲשׂוּיָ֔ה וְעַ֖ד בֵּ֥ית הַגִּבֹּרִֽים:

י״ז אַֽחֲרָ֛יו הֶֽחֱזִ֥יקוּ הַֽלְוִיִּ֖ם רְח֣וּם בֶּן־בָּנִ֑י עַל־יָד֣וֹ הֶֽחֱזִ֗יק חֲשַׁבְיָ֛ה שַׂר־חֲצִי־פֶ֥לֶךְ קְעִילָ֖ה לְפִלְכּֽוֹ:

י״ח אַֽחֲרָיו֙ הֶֽחֱזִ֣יקוּ אֲחֵיהֶ֔ם בַּוַּ֖י בֶּן־חֵֽנָדָ֑ד שַׂ֕ר חֲצִ֖י פֶּ֥לֶךְ קְעִילָֽה:

י״ט וַיְחַזֵּ֨ק עַל־יָד֜וֹ עֵ֧זֶר בֶּן־יֵשׁ֛וּעַ שַׂ֥ר הַמִּצְפָּ֖ה מִדָּ֣ה שֵׁנִ֑ית מִנֶּ֕גֶד עֲלֹ֥ת הַנֶּ֖שֶׁק הַמִּקְצֹֽעַ:

כ׳ אַֽחֲרָ֨יו הֶֽחֱרָ֧ה הֶֽחֱזִ֛יק בָּר֥וּךְ בֶּן־זַכַּ֖י (כתיב זַבַּ֖י) מִדָּ֣ה שֵׁנִ֑ית מִ֨ן־הַמִּקְצֹ֔עַ עַד־פֶּ֙תַח֙ בֵּ֣ית אֶלְיָשִׁ֔יב הַכֹּהֵ֖ן הַגָּדֽוֹל:

כ״א אַֽחֲרָ֣יו הֶֽחֱזִ֗יק מְרֵמ֧וֹת בֶּן־אֽוּרִיָּ֛ה בֶּן־הַקּ֖וֹץ מִדָּ֣ה שֵׁנִ֑ית מִפֶּ֙תַח֙ בֵּ֣ית אֶלְיָשִׁ֔יב וְעַד־תַּכְלִ֖ית בֵּ֥ית אֶלְיָשִֽׁיב:

כ״ב וְאַֽחֲרָ֛יו הֶֽחֱזִ֥יקוּ הַכֹּֽהֲנִ֖ים אַנְשֵׁ֥י הַכִּכָּֽר:

כ״ג אַֽחֲרָ֨יו הֶֽחֱזִ֧יק בִּנְיָמִ֛ן וְחַשּׁ֖וּב נֶ֣גֶד בֵּיתָ֑ם אַֽחֲרָ֣יו הֶֽחֱזִ֗יק עֲזַרְיָ֧ה בֶן־מַֽעֲשֵׂיָ֛ה בֶּן־עֲנָֽנְיָ֖ה אֵ֥צֶל בֵּיתֽוֹ:

כ״ד אַֽחֲרָ֣יו הֶֽחֱזִ֗יק בִּנּ֛וּי בֶּן־חֵֽנָדָ֖ד מִדָּ֣ה שֵׁנִ֑ית מִבֵּ֣ית עֲזַרְיָ֔ה עַד־הַמִּקְצ֖וֹעַ וְעַד־הַפִּנָּֽה:

כ״ה פָּלָ֣ל בֶּן־אוּזַי֘ מִנֶּ֣גֶד הַמִּקְצוֹעַ֒ וְהַמִּגְדָּ֗ל הַיּוֹצֵא֙ מִבֵּ֚ית הַמֶּ֙לֶךְ֙ הָֽעֶלְי֔וֹן אֲשֶׁ֖ר לַֽחֲצַ֣ר הַמַּטָּרָ֑ה אַֽחֲרָ֖יו פְּדָיָ֥ה בֶן־פַּרְעֹֽשׁ:

כ״ו וְהַ֨נְּתִינִ֔ים הָי֥וּ יֹֽשְׁבִ֖ים בָּעֹ֑פֶל עַ֠ד נֶ֜גֶד שַׁ֚עַר הַמַּ֙יִם֙ לַמִּזְרָ֔ח וְהַמִּגְדָּ֖ל הַיּוֹצֵֽא:

כ״ז אַֽחֲרָ֛יו הֶֽחֱזִ֥יקוּ הַתְּקֹעִ֖ים מִדָּ֣ה שֵׁנִ֑ית מִנֶּ֜גֶד הַמִּגְדָּ֚ל הַגָּדוֹל֙ הַיּוֹצֵ֔א וְעַ֖ד חוֹמַ֥ת הָעֹֽפֶל:

כ״ח מֵעַ֣ל | שַׁ֣עַר הַסּוּסִ֗ים הֶֽחֱזִ֙יקוּ֙ הַכֹּ֣הֲנִ֔ים אִ֖ישׁ לְנֶ֥גֶד בֵּיתֽוֹ:

כ״ט אַֽחֲרָ֧יו הֶֽחֱזִ֛יק צָד֥וֹק בֶּן־אִמֵּ֖ר נֶ֣גֶד בֵּית֑וֹ וְאַֽחֲרָ֚יו הֶֽחֱזִיק֙ שְׁמַעְיָ֣ה בֶן־שְׁכַנְיָ֔ה שֹׁמֵ֖ר שַׁ֥עַר הַמִּזְרָֽח:

ל׳ אַֽחֲרָ֨יו (כתיב אַֽחֲרָ֨י) הֶֽחֱזִ֜יק חֲנַנְיָ֣ה בֶן־שֶֽׁלֶמְיָ֗ה וְחָנ֧וּן בֶּן־צָלָ֛ף הַשִּׁשִּׁ֖י מִדָּ֣ה שֵׁנִ֑י אַֽחֲרָ֣יו הֶֽחֱזִ֗יק מְשֻׁלָּם֙ בֶּן־בֶּ֣רֶכְיָ֔ה נֶ֖גֶד נִשְׁכָּתֽוֹ:

ל״א אַֽחֲרָ֣יו (כתיב אַֽחֲרָ֣י) הֶֽחֱזִ֗יק מַלְכִּיָּה֙ בֶּן־הַצֹּ֣רְפִ֔י עַד־בֵּ֥ית הַנְּתִינִ֖ים וְהָרֹֽכְלִ֑ים נֶגֶד שַׁ֣עַר הַמִּפְקָ֔ד וְעַ֖ד עֲלִיַּ֥ת הַפִּנָּֽה:

ל״ב וּבֵ֨ין עֲלִיַּ֚ת הַפִּנָּה֙ לְשַׁ֣עַר הַצֹּ֔אן הֶֽחֱזִ֥יקוּ הַצֹּֽרְפִ֖ים וְהָרֹֽכְלִֽים:

ל״ג וַיְהִ֞י כַּֽאֲשֶׁ֧ר שָׁמַ֣ע סַנְבַלַּ֗ט כִּֽי־אֲנַ֚חְנוּ בוֹנִים֙ אֶת־הַ֣חוֹמָ֔ה וַיִּ֣חַר ל֔וֹ וַיִּכְעַ֖ס הַרְבֵּ֑ה וַיַּלְעֵ֖ג עַל־הַיְּהוּדִֽים:

ל״ד וַיֹּ֣אמֶר | לִפְנֵ֣י אֶחָ֗יו וְחֵיל֙ שֹֽׁמְר֔וֹן וַיֹּ֕אמֶר מָ֛ה הַיְּהוּדִ֥ים הָֽאֲמֵֽלָלִ֖ים עֹשִׂ֑ים הֲיַֽעַזְב֨וּ לָהֶ֚ם הֲיִזְבָּ֙חוּ֙ הַיְכַלּ֣וּ בַיּ֔וֹם הַיְחַיּ֧וּ אֶת־הָֽאֲבָנִ֛ים מֵֽעֲרֵמ֥וֹת הֶֽעָפָ֖ר וְהֵ֥מָּה שְׂרוּפֽוֹת:

ל״ה וְטֽוֹבִיָּ֥ה הָֽעַמֹּנִ֖י אֶצְל֑וֹ וַיֹּ֗אמֶר גַּם אֲשֶׁר־הֵ֣ם בּוֹנִ֔ים אִם־יַֽעֲלֶ֣ה שׁוּעָ֔ל וּפָרַ֖ץ חוֹמַ֥ת אַבְנֵיהֶֽם:

ל״ו שְׁמַ֚ע אֱלֹהֵ֙ינוּ֙ כִּֽי־הָיִ֣ינוּ בוּזָ֔ה וְהָשֵׁ֥ב חֶרְפָּתָ֖ם אֶל־רֹאשָׁ֑ם וּתְנֵ֥ם לְבִזָּ֖ה בְּאֶ֥רֶץ שִׁבְיָֽה:

ל״ז וְאַל־תְּכַס֙ עַל־עֲו‍ֹנָ֔ם וְחַטָּאתָ֖ם מִלְּפָנֶ֣יךָ אַל־תִּמָּחֶ֑ה כִּ֥י הִכְעִ֖יסוּ לְנֶ֥גֶד הַבּוֹנִֽים:

ל״ח וַנִּבְנֶה֙ אֶת־הַ֣חוֹמָ֔ה וַתִּקָּשֵׁ֥ר כָּל־הַֽחוֹמָ֖ה עַד־חֶצְיָ֑הּ וַיְהִ֧י לֵ֥֥ב לָעָ֖ם לַֽעֲשֽׂוֹת: