Nechemiah — Perek 12

נחמיה פרק י״ב

א׳ וְאֵ֙לֶּה֙ הַכֹּֽהֲנִ֣ים וְהַֽלְוִיִּ֔ם אֲשֶׁ֥ר עָל֛וּ עִם־זְרֻבָּבֶ֥ל בֶּן־שְׁאַלְתִּיאֵ֖ל וְיֵשׁ֑וּעַ שְׂרָיָ֥ה יִרְמְיָ֖ה עֶזְרָֽא:

ב׳ אֲמַרְיָ֥ה מַלּ֖וּךְ חַטּֽוּשׁ:

ג׳ שְׁכַנְיָ֥ה רְחֻ֖ם מְרֵמֹֽת:

ד׳ עִדּ֥וֹא גִנְּת֖וֹי אֲבִיָּֽה:

ה׳ מִיָּמִ֥ין מַֽעַדְיָ֖ה בִּלְגָּֽה:

ו׳ שְׁמַעְיָ֥ה וְיֽוֹיָרִ֖יב יְדַעְיָֽה:

ז׳ סַלּ֣וּ עָמ֔וֹק חִלְקִיָּ֖ה יְדַעְיָ֑ה אֵ֣לֶּה רָאשֵׁ֧י הַכֹּֽהֲנִ֛ים וַֽאֲחֵיהֶ֖ם בִּימֵ֥י יֵשֽׁוּעַ:

ח׳ וְהַֽלְוִיִּ֗ם יֵשׁ֧וּעַ בִּנּ֛וּי קַדְמִיאֵ֥ל שֵֽׁרֵבְיָ֖ה יְהוּדָ֣ה מַתַּנְיָ֑ה עַל־הֻיְּד֖וֹת ה֥וּא וְאֶחָֽיו:

ט׳ וּבַקְבֻּקְיָ֨ה וְעֻנִּ֧י (כתיב וְעֻנִּ֧ו) אֲחֵיהֶ֛ם לְנֶגְדָּ֖ם לְמִשְׁמָרֽוֹת:

י׳ וְיֵשׁ֖וּעַ הוֹלִ֣יד אֶת־יֽוֹיָקִ֑ים וְיֽוֹיָקִים֙ הוֹלִ֣יד אֶת־אֶלְיָשִׁ֔יב וְאֶלְיָשִׁ֖יב אֶת־יוֹיָדָֽע:

י״א וְיֽוֹיָדָע֙ הוֹלִ֣יד אֶת־יוֹנָתָ֔ן וְיוֹנָתָ֖ן הוֹלִ֥יד אֶת־יַדּֽוּעַ:

י״ב וּבִימֵי֙ יֽוֹיָקִ֔ים הָי֥וּ כֹֽהֲנִ֖ים רָאשֵׁ֣י הָאָב֑וֹת לִשְׂרָיָ֣ה מְרָיָ֔ה לְיִרְמְיָ֖ה חֲנַנְיָֽה:

י״ג לְעֶזְרָ֣א מְשֻׁלָּ֔ם לַֽאֲמַרְיָ֖ה יְהֽוֹחָנָֽן:

י״ד לִמְלִ֙יכוּ֙ (כתיב לִמְלִ֙וכיּ֙) יֽוֹנָתָ֔ן לִשְׁבַנְיָ֖ה יוֹסֵֽף:

ט״ו לְחָרִ֣ם עַדְנָ֔א לִמְרָי֖וֹת חֶלְקָֽי:

ט״ז לְעִדּ֥וֹא (כתיב לְעִדֹּ֥יא) זְכַרְיָ֖ה לְגִנְּת֥וֹן מְשֻׁלָּֽם:

י״ז לַֽאֲבִיָּ֖ה זִכְרִ֑י לְמִ֨נְיָמִ֔ין לְמֽוֹעַדְיָ֖ה פִּלְטָֽי:

י״ח לְבִלְגָּ֣ה שַׁמּ֔וּעַ לִשְׁמַעְיָ֖ה יְהוֹנָתָֽן:

י״ט וּלְיֽוֹיָרִ֣יב מַתְּנַ֔י לִֽידַעְיָ֖ה עֻזִּֽי:

כ׳ לְסַלַּ֥י קַלַּ֖י לְעָמ֥וֹק עֵֽבֶר:

כ״א לְחִלְקִיָּ֣ה חֲשַׁבְיָ֔ה לִֽידַעְיָ֖ה נְתַנְאֵֽל:

כ״ב הַֽלְוִיִּם֩ בִּימֵ֨י אֶלְיָשִׁ֜יב יֽוֹיָדָ֚ע וְיֽוֹחָנָן֙ וְיַדּ֔וּעַ כְּתוּבִ֖ים רָאשֵׁ֣י אָב֑וֹת וְהַכֹּ֣הֲנִ֔ים עַל־מַלְכ֖וּת דָּֽרְיָ֥וֶשׁ הַפַּֽרְסִֽי:

כ״ג בְּנֵ֚י לֵוִי֙ רָאשֵׁ֣י הָֽאָב֔וֹת כְּתוּבִ֕ים עַל־סֵ֖פֶר דִּבְרֵ֣י הַיָּמִ֑ים וְעַד־יְמֵ֖י יֽוֹחָנָ֥ן בֶּן־אֶלְיָשִֽׁיב:

כ״ד וְרָאשֵׁ֣י הַֽ֠לְוִיִּם חֲשַׁבְיָ֨ה שֵֽׁרֵבְיָ֜ה וְיֵשׁ֚וּעַ בֶּן־קַדְמִיאֵל֙ וַֽאֲחֵיהֶ֣ם לְנֶגְדָּ֔ם לְהַלֵּ֣ל לְהוֹד֔וֹת בְּמִצְוַ֖ת דָּוִ֣יד אִישׁ־הָֽאֱלֹהִ֑ים מִשְׁמָ֖ר לְעֻמַּ֥ת מִשְׁמָֽר:

כ״ה מַתַּנְיָ֧ה וּבַקְבֻּֽקְיָ֛ה עֹֽבַדְיָ֥ה מְשֻׁלָּ֖ם טַלְמ֣וֹן עַקּ֑וּב שֹֽׁמְרִ֚ים שֽׁוֹעֲרִים֙ מִשְׁמָ֔ר בַּֽאֲסֻפֵּ֖י הַשְּׁעָרִֽים:

כ״ו אֵ֕לֶּה בִּימֵ֛י יֽוֹיָקִ֥ים בֶּן־יֵשׁ֖וּעַ בֶּן־יֽוֹצָדָ֑ק וּבִימֵי֙ נְחֶמְיָ֣ה הַפֶּחָ֔ה וְעֶזְרָ֥א הַכֹּהֵ֖ן הַסּוֹפֵֽר:

כ״ז וּבַֽחֲנֻכַּ֞ת חוֹמַ֣ת יְרֽוּשָׁלִַ֗ם בִּקְשׁ֚וּ אֶת־הַלְוִיִּם֙ מִכָּל־מְק֣וֹמֹתָ֔ם לַֽהֲבִיאָ֖ם לִירֽוּשָׁלִָ֑ם לַֽעֲשׂ֨ת חֲנֻכָּ֚ה וְשִׂמְחָה֙ וּבְתוֹד֣וֹת וּבְשִׁ֔יר מְצִלְתַּ֖יִם נְבָלִ֥ים וּבְכִנֹּרֽוֹת:

כ״ח וַיֵּאָ֣סְפ֔וּ בְּנֵ֖י הַֽמְשֹֽׁרְרִ֑ים וּמִן־הַכִּכָּר֙ סְבִיב֣וֹת יְרֽוּשָׁלִַ֔ם וּמִן־חַצְרֵ֖י נְטֹֽפָתִֽי:

כ״ט וּמִבֵּית֙ הַגִּלְגָּ֔ל וּמִשְּׂד֥וֹת גֶּ֖בַע וְעַזְמָ֑וֶת כִּ֣י חֲצֵרִ֗ים בָּנ֚וּ לָהֶם֙ הַמְשֹׁ֣רְרִ֔ים סְבִיב֖וֹת יְרֽוּשָׁלִָֽם:

ל׳ וַיִּטַּֽהֲר֔וּ הַכֹּֽהֲנִ֖ים וְהַֽלְוִיִּ֑ם וַיְטַֽהֲרוּ֙ אֶת־הָעָ֔ם וְאֶת־הַשְּׁעָרִ֖ים וְאֶת־הַֽחוֹמָֽה:

ל״א וָאַֽעֲלֶה֙ אֶת־שָׂרֵ֣י יְהוּדָ֔ה מֵעַ֖ל לַחוֹמָ֑ה וָאַֽעֲמִ֡ידָה שְׁתֵּ֣י תוֹדֹת֩ גְּדוֹלֹ֨ת וְתַֽהֲלֻכֹ֚ת לַיָּמִין֙ מֵעַ֣ל לַחוֹמָ֔ה לְשַׁ֖עַר הָֽאַשְׁפֹּֽת:

ל״ב וַיֵּ֚לֶךְ אַֽחֲרֵיהֶם֙ הֽוֹשַׁעְיָ֔ה וַֽחֲצִ֖י שָׂרֵ֥י יְהוּדָֽה:

ל״ג וַֽעֲזַרְיָ֥ה עֶזְרָ֖א וּמְשֻׁלָּֽם:

ל״ד יְהוּדָה֙ וּבִנְיָמִ֔ן וּשְׁמַעְיָ֖ה וְיִרְמְיָֽה:

ל״ה וּמִבְּנֵ֥י הַכֹּֽהֲנִ֖ים בַּֽחֲצֹֽצְר֑וֹת זְכַרְיָ֨ה בֶן־יֽוֹנָתָ֜ן בֶּן־שְׁמַעְיָ֚ה בֶן־מַתַּנְיָה֙ בֶּן־מִ֣יכָיָ֔ה בֶּן־זַכּ֖וּר בֶּן־אָסָֽף:

ל״ו וְאֶחָ֡יו שְׁמַעְיָ֡ה וַֽעֲזַרְאֵ֡ל מִֽלֲלַ֡י גִּֽלֲלַ֡י מָעַ֞י נְתַנְאֵ֚ל וִֽיהוּדָה֙ חֲנָ֔נִי בִּכְלֵי־שִׁ֥יר דָּוִ֖יד אִ֣ישׁ הָֽאֱלֹהִ֑ים וְעֶזְרָ֥א הַסּוֹפֵ֖ר לִפְנֵיהֶֽם:

ל״ז וְעַל֩ שַׁ֨עַר הָעַ֜יִן וְנֶגְדָּ֗ם עָלוּ֙ עַֽל־מַֽעֲלוֹת֙ עִ֣יר דָּוִ֔יד בַּמַּֽעֲלֶ֖ה לַֽחוֹמָ֑ה מֵעַל֙ לְבֵ֣ית דָּוִ֔יד וְעַ֛ד שַׁ֥עַר הַמַּ֖יִם מִזְרָֽח:

ל״ח וְהַתּוֹדָ֧ה הַשֵּׁנִ֛ית הַֽהוֹלֶ֥כֶת לְמ֖וֹל (כתיב לְמ֖וֹאל) וַֽאֲנִ֣י אַֽחֲרֶ֑יהָ וַֽחֲצִ֨י הָעָ֜ם מֵעַ֣ל לְהַחוֹמָ֗ה מֵעַל֙ לְמִגְדַּ֣ל הַתַּנּוּרִ֔ים וְעַ֖ד הַחוֹמָ֥ה הָרְחָבָֽה:

ל״ט וּמֵעַ֣ל לְשַֽׁעַר־אֶ֠פְרַיִם וְעַל־שַׁ֨עַר הַיְשָׁנָ֜ה וְעַל־שַׁ֣עַר הַדָּגִ֗ים וּמִגְדַּ֚ל חֲנַנְאֵל֙ וּמִגְדַּ֣ל הַמֵּאָ֔ה וְעַ֖ד שַׁ֣עַר הַצֹּ֑אן וְעָ֣מְד֔וּ בְּשַׁ֖עַר הַמַּטָּרָֽה:

מ׳ וַתַּֽעֲמֹ֛דְנָה שְׁתֵּ֥י הַתּוֹדֹ֖ת בְּבֵ֣ית הָאֱלֹהִ֑ים וַֽאֲנִ֕י וַֽחֲצִ֥י הַסְּגָנִ֖ים עִמִּֽי:

מ״א וְהַכֹּ֣הֲנִ֡ים אֶלְיָקִ֡ים מַֽעֲשֵׂיָ֡ה מִ֠נְיָמִין מִֽיכָיָ֧ה אֶלְיֽוֹעֵינַ֛י זְכַרְיָ֥ה חֲנַנְיָ֖ה בַּֽחֲצֹֽצְרֽוֹת:

מ״ב וּמַֽעֲשֵׂיָ֨ה וּשְׁמַעְיָ֜ה וְאֶלְעָזָ֧ר וְעֻזִּ֛י וִיהֽוֹחָנָ֥ן וּמַלְכִּיָּ֖ה וְעֵילָ֣ם וָעָ֑זֶר וַיַּשְׁמִ֙יעוּ֙ הַמְשֹׁ֣רְרִ֔ים וְיִזְרַחְיָ֖ה הַפָּקִֽיד:

מ״ג וַיִּזְבְּח֣וּ בַיּ֣וֹם הַ֠הוּא זְבָחִ֨ים גְּדוֹלִ֜ים וַיִּשְׂמָ֗חוּ כִּ֚י הָֽאֱלֹהִים֙ שִׂמְּחָם֙ שִׂמְחָ֣ה גְדוֹלָ֔ה וְגַ֧ם הַנָּשִׁ֛ים וְהַיְלָדִ֖ים שָׂמֵ֑חוּ וַתִּשָּׁמַ֛ע שִׂמְחַ֥ת יְרֽוּשָׁלִַ֖ם מֵרָחֽוֹק:

מ״ד וַיִּפָּֽקְד֣וּ בַיּוֹם֩ הַה֨וּא אֲנָשִׁ֜ים עַל־הַנְּשָׁכ֗וֹת לָא֨וֹצָר֥וֹת לַתְּרוּמוֹת֘ לָֽרֵאשִׁ֣ית וְלַמַּֽעַשְׂרוֹת֒ לִכְנ֨וֹס בָּהֶ֜ם לִשְׂדֵ֚י הֶֽעָרִים֙ מְנָא֣וֹת הַתּוֹרָ֔ה לַכֹּֽהֲנִ֖ים וְלַֽלְוִיִּ֑ם כִּי שִׂמְחַ֣ת יְהוּדָ֔ה עַל־הַכֹּֽהֲנִ֥ים וְעַל־הַלְוִיִּ֖ם הָעֹֽמְדִֽים:

מ״ה וַיִּשְׁמְר֞וּ מִשְׁמֶ֚רֶת אֱלֹֽהֵיהֶם֙ וּמִשְׁמֶ֣רֶת הַטָּֽהֳרָ֗ה וְהַֽמְשֹֽׁרְרִ֖ים וְהַשֹּֽׁעֲרִ֑ים כְּמִצְוַ֥ת דָּוִ֖יד שְׁלֹמֹ֥ה בְנֽוֹ:

מ״ו כִּֽי־בִימֵ֥י דָּוִ֛יד וְאָסָ֖ף מִקֶּ֑דֶם רָאשֵׁי֙ (כתיב רָאשֵׁ֙) הַֽמְשֹֽׁרְרִ֔ים וְשִֽׁיר־תְּהִלָּ֥ה וְהוֹד֖וֹת לֵֽאלֹהִֽים:

מ״ז וְכָל־יִשְׂרָאֵל֩ בִּימֵ֨י זְרֻבָּבֶ֜ל וּבִימֵ֣י נְחֶמְיָ֗ה נֹֽתְנִ֛ים מְנָי֛וֹת הַֽמְשֹֽׁרְרִ֥ים וְהַשֹּֽׁעֲרִ֖ים דְּבַר־י֣וֹם בְּיוֹמ֑וֹ וּמַקְדִּשִׁים֙ לַֽלְוִיִּ֔ם וְהַֽלְוִיִּ֔ם מַקְדִּשִׁ֖ים לִבְנֵ֛י אַֽהֲרֹֽן: