Mishlei — Perek 5

א׳ בְּנִי לְחָכְמָתִ֣י הַקְשִׁ֑יבָה לִ֜תְבוּנָתִ֗י הַט־אָזְנֶֽךָ:

ב׳ לִשְׁמֹ֥ר מְזִמּ֑וֹת וְ֜דַ֗עַת שְׂפָתֶ֥יךָ יִנְצֹֽרוּ:

ג׳ כִּ֤י נֹ֣פֶת תִּ֖טֹּפְנָה שִׂפְתֵ֣י זָרָ֑ה וְחָלָ֖ק מִשֶּׁ֣מֶן חִכָּֽהּ:

ד׳ וְֽאַחֲרִיתָהּ מָרָ֣ה כַֽלַּעֲנָ֑ה חַדָּ֗ה כְּחֶ֣רֶב פִּיּֽוֹת:

ה׳ רַגְלֶיהָ יֹרְד֣וֹת מָ֑וֶת שְׁ֜א֗וֹל צְעָדֶ֥יהָ יִתְמֹֽכוּ:

ו׳ אֹ֣רַח חַ֖יִּים פֶּן־תְּפַלֵּ֑ס נָע֥וּ מַ֜עְגְּלֹתֶ֗יהָ לֹ֣א תֵדָֽע:

ז׳ וְעַתָּ֣ה בָ֖נִים שִׁמְעוּ־לִ֑י וְאַל־תָּ֜ס֗וּרוּ מֵאִמְרֵי־פִֽי:

ח׳ הַרְחֵ֣ק מֵעָלֶ֣יהָ דַרְכֶּ֑ךָ וְאַל־תִּ֜קְרַ֗ב אֶל־פֶּ֥תַח בֵּיתָֽהּ:

ט׳ פֶּן־תִּתֵּ֣ן לַאֲחֵרִ֣ים הוֹדֶ֑ךָ וּ֜שְׁנֹתֶ֗יךָ לְאַכְזָרִֽי:

י׳ פֶּֽן־יִשְׂבְּע֣וּ זָרִ֣ים כֹּחֶ֑ךָ וַ֜עֲצָבֶ֗יךָ בְּבֵ֣ית נָכְרִֽי:

י״א וְנָהַמְתָּ֥ בְאַחֲרִיתֶ֑ךָ בִּכְל֥וֹת בְּ֜שָׂרְךָ֗ וּשְׁאֵרֶֽךָ:

י״ב וְֽאָמַרְתָּ֗ אֵ֖יךְ שָׁנֵ֣אתִי מוּסָ֑ר וְ֜תוֹכַ֗חַת נָאַ֥ץ לִבִּֽי:

י״ג וְֽלֹא־שָׁ֖מַעְתִּי בְּק֣וֹל מוֹרָ֑י וְ֜לִֽמְלַמְּדַ֗י לֹא־הִטִּ֥יתִי אָזְנִֽי:

י״ד כִּמְעַט הָיִ֣יתִי בְכָל־רָ֑ע בְּת֖וֹךְ קָהָ֣ל וְעֵדָֽה:

ט״ו שְׁתֵה־מַ֥יִם מִבּוֹרֶ֑ךָ וְ֜נֹזְלִ֗ים מִתּ֥וֹךְ בְּאֵרֶֽךָ:

ט״ז יָפ֣וּצוּ מַעְיְנֹתֶ֣יךָ ח֑וּצָה בָּ֜רְחֹב֗וֹת פַּלְגֵי־מָֽיִם:

י״ז יִֽהְיוּ־לְךָ֥ לְבַדֶּ֑ךָ וְאֵ֖ין לְזָרִ֣ים אִתָּֽךְ:

י״ח יְהִֽי־מְקוֹרְךָ֥ בָר֑וּךְ וּ֜שְׂמַ֗ח מֵאֵ֥שֶׁת נְעוּרֶֽךָ:

י״ט אַיֶּ֥לֶת אֲהָבִ֗ים וְֽיַעֲלַ֫ת־חֵ֥ן דַּ֖דֶּיהָ יְרַוֻּ֣ךָ בְכָל־עֵ֑ת בְּ֜אַהֲבָתָ֗הּ תִּשְׁגֶּ֥ה תָמִֽיד:

כ׳ וְלָ֤מָּה תִשְׁגֶּ֣ה בְנִ֣י בְזָרָ֑ה וּ֜תְחַבֵּ֗ק חֵ֣ק נָכְרִיָּֽה:

כ״א כִּ֤י נֹ֨כַח עֵינֵ֣י יְ֖הוָה דַּרְכֵי־אִ֑ישׁ וְֽכָל־מַעְגְּלֹתָ֥יו מְפַלֵּֽס:

כ״ב עַֽווֹנוֹתָ֗יו יִלְכְּדֻנ֥וֹ אֶת־הָרָשָׁ֑ע וּבְחַבְלֵ֥י חַ֜טָּאת֗וֹ יִתָּמֵֽךְ:

כ״ג ה֗וּא יָ֖מוּת בְּאֵ֣ין מוּסָ֑ר וּבְרֹ֖ב אִוַּלְתּ֣וֹ יִשְׁגֶּֽה: