Iyov — Perek 38

איוב פרק ל״ח

א׳ וַיַּֽעַן־יְהֹוָ֣ה אֶת־אִ֖יּוֹב מִ֥ן | (כתיב מִ֥נ) הַסְּעָרָ֗ה וַיֹּֽאמַר:

ב׳ מִ֚י זֶ֨ה | מַחְשִׁ֖יךְ עֵצָ֥ה בְמִלִּ֗ין בְּֽלִי־דָֽעַת:

ג׳ אֱזָר־נָ֣א כְגֶ֣בֶר חֲלָצֶ֑יךָ וְ֜אֶשְׁאָֽלְךָ֗ וְהֽוֹדִיעֵֽנִי:

ד׳ אֵיפֹ֣ה הָ֖יִיתָ בְּיָסְדִי־אָ֑רֶץ הַ֜גֵּ֗ד אִם־יָדַ֥עְתָּ בִינָֽה:

ה׳ מִי־שָׂ֣ם מְ֖מַדֶּיהָ כִּ֣י תֵדָ֑ע א֚וֹ מִֽי־נָטָ֖ה עָלֶ֣יהָ קָּֽו:

ו׳ עַל־מָ֖ה אֲדָנֶ֣יהָ הָטְבָּ֑עוּ א֥וֹ מִֽי־יָֽ֜רָ֗ה אֶ֣בֶן פִּנָּתָֽהּ:

ז׳ בְּרָן־יַ֖חַד כּ֣וֹכְבֵי בֹ֑קֶר וַ֜יָּרִ֗יעוּ כָּל־בְּנֵ֥י אֱלֹהִֽים:

ח׳ וַיָּ֣סֶךְ בִּדְלָתַ֣יִם יָ֑ם בְּ֜גִיח֗וֹ מֵרֶ֥חֶם יֵצֵֽא:

ט׳ בְּשׂוּמִ֣י עָנָ֣ן לְבֻשׁ֑וֹ וַֽ֜עֲרָפֶ֗ל חֲתֻלָּתֽוֹ:

י׳ וָֽאֶשְׁבֹּ֣ר עָלָ֣יו חֻקִּ֑י וָֽ֜אָשִׂ֗ים בְּרִ֣יחַ וּדְלָתָֽיִם:

י״א וָאֹמַ֗ר עַד־פֹּ֣ה תָ֖בוֹא וְלֹ֣א תֹסִ֑יף וּפֹ֥א יָ֜שִׁ֗ית בִּגְא֥וֹן גַּלֶּֽיךָ:

י״ב הֲמִיָּמֶיךָ צִוִּ֣יתָ בֹּ֑קֶר יִדַּ֖עְתָּ הַשַּׁ֣חַר (כתיב יִדַּ֖עְתָּהַ שַּׁ֣חַר) מְקוֹמֽוֹ:

י״ג לֶֽאֱחֹז בְּכַנְפ֣וֹת הָאָ֑רֶץ וְיִנָּֽעֲר֖וּ רְשָׁעִ֣ים מִמֶּֽנָּה:

י״ד תִּתְהַפֵּךְ כְּחֹ֣מֶר חוֹתָ֑ם וְ֜יִֽתְיַצְּב֗וּ כְּמ֣וֹ לְבֽוּשׁ:

ט״ו וְיִמָּנַ֣ע מֵרְשָׁעִ֣ים אוֹרָ֑ם וּזְר֥וֹעַ רָ֜מָ֗ה תִּשָּׁבֵֽר:

ט״ז הֲבָאתָ עַד־נִבְכֵי־יָ֑ם וּבְחֵ֥קֶר תְּ֜ה֗וֹם הִתְהַלָּֽכְתָּ:

י״ז הֲנִגְל֣וּ לְ֖ךָ שַֽׁעֲרֵי־מָ֑וֶת וְשַֽׁעֲרֵ֖י צַלְמָ֣וֶת תִּרְאֶֽה:

י״ח הִתְבֹּנַנְתָּ עַד־רַֽחֲבֵי־אָ֑רֶץ הַ֜גֵּ֗ד אִם־יָדַ֥עְתָּ כֻלָּֽהּ:

י״ט אֵי־זֶ֣ה הַ֖דֶּרֶךְ יִשְׁכָּן־א֑וֹר וְ֜חֹ֗שֶׁךְ אֵי־זֶ֥ה מְקֹמֽוֹ:

כ׳ כִּ֣י תִ֖קָּחֶנּוּ אֶל־גְּבוּל֑וֹ וְכִ֥י תָ֜בִין נְתִיב֥וֹת בֵּיתֽוֹ:

כ״א יָדַעְתָּ כִּי־אָ֣ז תִּוָּלֵ֑ד וּמִסְפַּ֖ר יָמֶ֣יךָ רַבִּֽים:

כ״ב הֲבָאתָ אֶל־אֹֽצְר֣וֹת שָׁ֑לֶג וְאוֹצְר֖וֹת בָּרָ֣ד תִּרְאֶֽה:

כ״ג אֲשֶׁר־חָשַׂ֥כְתִּי לְעֶ֣ת־צָ֑ר לְי֥וֹם קְ֜רָ֗ב וּמִלְחָמָֽה:

כ״ד אֵי־זֶ֣ה הַ֖דֶּרֶךְ יֵחָ֣לֶק א֑וֹר יָפֵ֖ץ קָדִ֣ים עֲלֵי־אָֽרֶץ:

כ״ה מִֽי־פִלַּ֣ג לַשֶּׁ֣טֶף תְּעָלָ֑ה וְ֜דֶ֗רֶךְ לַֽחֲזִ֥יז קֹלֽוֹת:

כ״ו לְהַמְטִיר עַל־אֶ֣רֶץ לֹֽא־אִ֑ישׁ מִ֜דְבָּ֗ר לֹֽא־אָדָ֥ם בּֽוֹ:

כ״ז לְהַשְׂבִּ֣יעַ שֹׁ֖אָה וּמְשֹׁאָ֑ה וּלְ֜הַצְמִ֗יחַ מֹ֣צָא דֶֽשֶׁא:

כ״ח הֲיֵשׁ־לַמָּטָ֥ר אָ֑ב א֥וֹ מִי־ה֜וֹלִ֗יד אֶגְלֵי־טָֽל:

כ״ט מִבֶּ֣טֶן מִ֖י יָצָ֣א הַקָּ֑רַח וּכְפֹ֥ר שָׁ֜מַ֗יִם מִ֣י יְלָדֽוֹ:

ל׳ כָּאֶבֶן מַ֣יִם יִתְחַבָּ֑אוּ וּפְנֵ֥י תְ֜ה֗וֹם יִתְלַכָּֽדוּ:

ל״א הַתְקַשֵּׁר מַֽעֲדַנּ֣וֹת כִּימָ֑ה אֽוֹ־מֽוֹשְׁכ֖וֹת כְּסִ֣יל תְּפַתֵּֽחַ:

ל״ב הֲתֹצִ֣יא מַזָּר֣וֹת בְּעִתּ֑וֹ וְ֜עַ֗יִשׁ עַל־בָּנֶ֥יהָ תַנְחֵֽם:

ל״ג הֲיָדַעְתָּ חֻקּ֣וֹת שָׁמָ֑יִם אִם־תָּשִׂ֖ים מִשְׁטָר֣וֹ בָאָֽרֶץ:

ל״ד הֲתָרִ֣ים לָעָ֣ב קוֹלֶ֑ךָ וְֽשִׁפְעַת־מַ֥יִם תְּכַסֶּֽךָּ:

ל״ה הַֽתְשַׁלַּ֣ח בְּרָקִ֣ים וְיֵלֵ֑כוּ וְיֹֽאמְר֖וּ לְךָ֣ הִנֵּֽנוּ:

ל״ו מִי־שָׁ֖ת בַּטֻּח֣וֹת חָכְמָ֑ה א֚וֹ מִֽי־נָתַ֖ן לַשֶּׂ֣כְוִי בִינָֽה:

ל״ז מִֽי־יְסַפֵּ֣ר שְׁחָקִ֣ים בְּחָכְמָ֑ה וְנִבְלֵ֥י שָׁ֜מַ֗יִם מִ֣י יַשְׁכִּֽיב:

ל״ח בְּצֶ֣קֶת עָ֖פָר לַמּוּצָ֑ק וּרְגָבִ֥ים יְדֻבָּֽקוּ:

ל״ט הֲתָצ֣וּד לְלָבִ֣יא טָ֑רֶף וְחַיַּ֖ת כְּפִירִ֣ים תְּמַלֵּֽא:

מ׳ כִּי־יָשֹׁ֥חוּ בַמְּעוֹנ֑וֹת יֵֽשְׁב֖וּ בַסֻּכָּ֣ה לְמוֹ־אָֽרֶב:

מ״א מִ֚י יָכִ֥ין לָֽעֹרֵ֗ב צֵ֫יד֥וֹ כִּֽי־יְ֖לָדָיו (כתיב יְ֖לָדָו) אֶל־אֵ֣ל יְשַׁוֵּ֑עוּ יִ֜תְע֗וּ לִבְלִי־אֹֽכֶל: