Iyov — Perek 27

א׳ וַיֹּ֣סֶף אִ֖יּוֹב שְׂאֵ֥ת מְשָׁל֗וֹ וַיֹּֽאמַר:

ב׳ חַי־אֵ֖ל הֵסִ֣יר מִשְׁפָּטִ֑י וְ֜שַׁדַּ֗י הֵמַ֥ר נַפְשִֽׁי:

ג׳ כִּֽי־כָל־ע֣וֹד נִשְׁמָתִ֣י בִ֑י וְר֖וּחַ אֱל֣וֹהַּ בְּאַפִּֽי:

ד׳ אִם־תְּדַבֵּ֣רְנָה שְׂפָתַ֣י עַוְלָ֑ה וּלְ֜שׁוֹנִ֗י אִם־יֶהְגֶּ֥ה רְמִיָּֽה:

ה׳ חָלִ֣ילָה לִּי֘ אִם־אַצְדִּ֪יק אֶ֫תְכֶ֥ם עַד־אֶגְוָ֑ע לֹֽא־אָסִ֖יר תֻּמָּתִ֣י מִמֶּֽנִּי:

ו׳ בְּצִדְקָתִ֣י הֶֽ֖חֱזַקְתִּי וְלֹ֣א אַרְפֶּ֑הָ לֹא־יֶֽחֱרַ֥ף לְ֜בָבִ֗י מִיָּמָֽי:

ז׳ יְהִ֣י כְ֖רָשָׁע אֹ֣יְבִ֑י וּמִתְקֽוֹמְמִ֥י כְעַוָּֽל:

ח׳ כִּ֚י מַה־תִּקְוַ֣ת חָ֖נֵף כִּ֣י יִבְצָ֑ע כִּ֚י יֵ֖שֶׁל אֱל֣וֹהַּ נַפְשֽׁוֹ:

ט׳ הֲצַֽעֲקָתוֹ יִשְׁמַ֥ע | אֵ֑ל כִּֽי־תָב֖וֹא עָלָ֣יו צָרָֽה:

י׳ אִם־עַל־שַׁדַּ֥י יִתְעַנָּ֑ג יִקְרָ֖א אֱל֣וֹהַּ בְּכָל־עֵֽת:

י״א אוֹרֶ֣ה אֶתְכֶ֣ם בְּיַד־אֵ֑ל אֲשֶׁ֥ר עִם־שַׁ֜דַּ֗י לֹ֣א אֲכַחֵֽד:

י״ב הֵֽן־אַתֶּ֣ם כֻּלְּכֶ֣ם חֲזִיתֶ֑ם וְלָמָּה־זֶּ֜֗ה הֶ֣בֶל תֶּהְבָּֽלוּ:

י״ג זֶ֚ה | חֵֽלֶק־אָדָ֖ם רָשָׁ֥ע | עִם־אֵ֑ל וְֽנַֽחֲלַ֥ת עָ֜רִיצִ֗ים מִשַּׁדַּ֥י יִקָּֽחוּ:

י״ד אִם־יִרְבּ֣וּ בָנָ֣יו לְמוֹ־חָ֑רֶב וְ֜צֶֽאֱצָאָ֗יו לֹ֣א יִשְׂבְּעוּ־לָֽחֶם:

ט״ו שְׂרִידָיו בַּמָּ֣וֶת יִקָּבֵ֑רוּ וְ֜אַלְמְנֹתָ֗יו לֹ֣א תִבְכֶּֽנָה:

ט״ז אִם־יִצְבֹּ֣ר כֶּעָפָ֣ר כָּ֑סֶף וְ֜כַחֹ֗מֶר יָכִ֥ין מַלְבּֽוּשׁ:

י״ז יָכִין וְצַדִּ֣יק יִלְבָּ֑שׁ וְ֜כֶ֗סֶף נָקִ֥י יַֽחֲלֹֽק:

י״ח בָּנָ֣ה כָעָ֣שׁ בֵּית֑וֹ וּכְ֜סֻכָּ֗ה עָשָׂ֥ה נֹצֵֽר:

י״ט עָשִׁ֣יר יִ֖שְׁכַּב וְלֹ֣א יֵֽאָסֵ֑ף עֵינָ֖יו פָּקַ֣ח וְאֵינֶֽנּוּ:

כ׳ תַּשִּׂיגֵ֣הוּ כַ֖מַּיִם בַּלָּה֑וֹת לַ֜֗יְלָה גְּנָבַ֥תּוּ סוּפָֽה:

כ״א יִשָּׂאֵ֣הוּ קָדִ֣ים וְיֵלַ֑ךְ וִֽ֜ישַֽׂעֲרֵ֗הוּ מִמְּקֹמֽוֹ:

כ״ב וְיַשְׁלֵ֣ךְ עָ֖לָיו וְלֹ֣א יַחְמ֑וֹל מִ֜יָּד֗וֹ בָּר֥וֹחַ יִבְרָֽח:

כ״ג יִשְׂפֹּ֣ק עָלֵ֣ימוֹ כַפֵּ֑ימוֹ וְיִשְׁרֹ֥ק עָ֜לָ֗יו מִמְּקֹמֽוֹ: