Iyov — Perek 13

א׳ הֶן־כֹּ֖ל רָֽאֲתָ֣ה עֵינִ֑י שָֽׁמְעָ֥ה אָ֜זְנִ֗י וַתָּ֥בֶן לָֽהּ:

ב׳ כְּֽדַעְתְּכֶם יָדַ֣עְתִּי גַם־אָ֑נִי לֹֽא־נֹפֵ֖ל אָֽנֹכִ֣י מִכֶּֽם:

ג׳ אוּלָ֗ם אֲ֖נִי אֶל־שַׁדַּ֣י אֲדַבֵּ֑ר וְהוֹכֵ֖חַ אֶל־אֵ֣ל אֶחְפָּֽץ:

ד׳ וְֽאוּלָ֗ם אַ֖תֶּם טֹֽפְלֵי־שָׁ֑קֶר רֹפְאֵ֖י אֱלִ֣ל כֻּלְּכֶֽם:

ה׳ מִֽי־יִ֖תֵּן הַֽחֲרֵ֣שׁ תַּֽחֲרִישׁ֑וּן וּתְהִ֖י לָכֶ֣ם לְחָכְמָֽה:

ו׳ שִׁמְעוּ־נָ֥א תֽוֹכַחְתִּ֑י וְרִב֖וֹת שְׂפָתַ֣י הַקְשִֽׁיבוּ:

ז׳ הַֽלְאֵל תְּדַבְּר֣וּ עַוְלָ֑ה וְ֜ל֗וֹ תְּֽדַבְּר֥וּ רְמִיָּֽה:

ח׳ הֲפָנָ֥יו תִּשָּׂא֑וּן אִם־לָאֵ֥ל תְּרִיבֽוּן:

ט׳ הֲטוֹב כִּֽי־יַחְקֹ֣ר אֶתְכֶ֑ם אִם־כְּהָתֵ֥ל בֶּֽ֜אֱנ֗וֹשׁ תְּהָתֵ֥לּוּ בֽוֹ:

י׳ הוֹכֵ֣חַ יוֹכִ֣יחַ אֶתְכֶ֑ם אִם־בַּ֜סֵּ֗תֶר פָּנִ֥ים תִּשָּׂאֽוּן:

י״א הֲלֹ֣א שְׂ֖אֵתוֹ תְּבַעֵ֣ת אֶתְכֶ֑ם וּ֜פַחְדּ֗וֹ יִפֹּ֥ל עֲלֵיכֶֽם:

י״ב זִכְרֹֽנֵיכֶם מִשְׁלֵי־אֵ֑פֶר לְגַבֵּי־חֹ֜מֶ֗ר גַּבֵּיכֶֽם:

י״ג הַֽחֲרִ֣ישׁוּ מִ֖מֶּנִּי וַֽאֲדַבְּרָה־אָ֑נִי וְיַֽעֲבֹ֖ר עָלַ֣י מָֽה:

י״ד עַל־מָ֚ה | אֶשָּׂ֣א בְשָׂרִ֣י בְשִׁנָּ֑י וְ֜נַפְשִׁ֗י אָשִׂ֥ים בְּכַפִּֽי:

ט״ו הֵ֣ן יִ֖קְטְלֵנִי ל֣וֹ<span class="instructional ksiv"> (כתיב לֹ֣א) </span> אֲיַחֵ֑ל אַךְ־דְּ֜רָכַ֗י אֶל־פָּנָ֥יו אוֹכִֽיחַ:

ט״ז גַּם־הוּא־לִ֥י לִֽישׁוּעָ֑ה כִּי־לֹ֥א לְ֜פָנָ֗יו חָנֵ֥ף יָבֽוֹא:

י״ז שִׁמְע֣וּ שָׁ֖מוֹעַ מִלָּתִ֑י וְ֜אַֽחֲוָתִ֗י בְּאָזְנֵיכֶֽם:

י״ח הִנֵּה־נָ֖א עָרַ֣כְתִּי מִשְׁפָּ֑ט יָ֜דַ֗עְתִּי כִּֽי־אֲנִ֥י אֶצְדָּֽק:

י״ט מִי־ה֖וּא יָרִ֣יב עִמָּדִ֑י כִּֽי־עַתָּ֖ה אַֽחֲרִ֣ישׁ וְאֶגְוָֽע:

כ׳ אַךְ־שְׁ֖תַּיִם אַל־תַּ֣עַשׂ עִמָּדִ֑י אָ֥ז מִ֜פָּנֶ֗יךָ לֹ֣א אֶסָּתֵֽר:

כ״א כַּפְּךָ מֵֽעָלַ֣י הַרְחַ֑ק וְ֜אֵ֥ימָֽתְךָ֗ אַל־תְּבַֽעֲתַֽנִּי:

כ״ב וּקְרָא וְאָֽנֹכִ֣י אֶֽעֱנֶ֑ה א֥וֹ אֲ֜דַבֵּ֗ר וַֽהֲשִׁיבֵֽנִי:

כ״ג כַּמָּ֣ה לִ֖י עֲו‍ֹנ֣וֹת וְחַטָּא֑וֹת פִּשְׁעִ֥י וְ֜חַטָּאתִ֗י הֹֽדִיעֵֽנִי:

כ״ד לָֽמָּה־פָנֶ֥יךָ תַסְתִּ֑יר וְתַחְשְׁבֵ֖נִי לְאוֹיֵ֣ב לָֽךְ:

כ״ה הֶּעָלֶ֣ה נִדָּ֣ף תַּֽעֲר֑וֹץ וְאֶת־קַ֖שׁ יָבֵ֣שׁ תִּרְדֹּֽף:

כ״ו כִּֽי־תִכְתֹּ֣ב עָלַ֣י מְרֹר֑וֹת וְ֜תֽוֹרִישֵׁ֗נִי עֲו‍ֹנ֥וֹת נְעוּרָֽי:

כ״ז וְתָ֘שֵׂ֚ם בַּסַּ֨ד | רַגְלַ֗י וְתִשְׁמ֥וֹר כָּל־אָרְחֹתָ֑י עַל־שָׁרְשֵׁ֥י רַ֜גְלַ֗י תִּתְחַקֶּֽה:

כ״ח וְהוּא כְּרָקָ֣ב יִבְלֶ֑ה כְּ֜בֶ֗גֶד אֲכָ֣לוֹ עָֽשׁ: